Enchhin tum lo an tam tulh tulh – Zoramthanga

Kalphung thar tituten enchhin tura an inzawrh chu, a rei tulh tulh a, enchhin tum lo an tam tulh tulh tih MNF president Zoramthanga chuan a sawi.
Thawhtannia MNF office Mizo Hnam Runa inkhawmah Zoramthanga chuan Mizoram chu India ram leiba ngah tlem ber dawttu a ni chungin, ba tam berah chhuah luih tlat an ni tih a sawi. “Min beitute hian min beihna dang hre loin, kalphung thar min enchhin teh u, tih bak sawi tur dang an hre lo. A rei tulh tulh a, enchhin tum lo an tam tulh tulh a nih hi,” a ti.
MNF-in independent sual lo nia puhtute chu, an sual laia tel ve lo leh tel tluan peih lote an ni tih MNF president hian a sawi. “Kum 1966-ah independent kan sual a, kum 20 chhung an inkap. Ram tan zalenna kan sual lo, ti thin mah se, hnam martar thlanmual heti zat kan neih hian ram tan zalenna kan sual tih a tichiang,” a ti.
MNF adviser Dr R Lalthangliana pawhin roreltute chu enchhin chi an ni lo tih sawiin, “Tih fuh loh chuan kum hnih pawh a rei lutuk. Keini chuan kan tih mek leh tihtawhte atangin min teh se kan duh zawk,” a ti.
Assembly House-a kum 30 chuang a lo thut ve tawhah tun term (2018-2023) anga hun khirh bik kan la tawng ngai lo niin minister Dr R Lalthangliana hian a sawi a. A hun takah hun khirh laia kaihruai turin hruaitu tha Pu Zoramthanga Pathianin min pe tih a sawi. “Chief minister nih tum, lo hrawn tawhten an hrawn an hrechiang tulh tulh a, zui zel tlakah an ngai lo. Keini chuan kan zui rei telh telh a, a zui tlakzia kan hrechiang tulh tulh a ni,” a ti.