Nupa nun hlim nan

Mipa leh hmeichhia chu mi ang lo tak kan ni tih kan pawm. Mahse, a hmei a pain nupa nun hlim taka hman erawh kan duh theuh. Nupa nun hlimna thuruk hi thil harsa leh khirh tak emaw kan ti a, mahse, chutiang a ni lo, kan duh leh mamawh te inhriat tawn sak hi nupa hlimna thuruk chu a ni ber mai.
Relationship lama mithiam ten kawppui te hlim taka siam dan tur kawng an sawi te kan rawn tarlang a, nupuiin a pasal a tih hlima, pasalin a nupui a tihlim bawk chuan, chu aia nupa hlimna thuruk dang a awm chuang lo.
Hriat reng tur pakhat chu, hlimna chu a thlawna neih ngawt theih a ni bik lova, a thawha thawh chhuah ve a ngai. I awm mai mai a, engmah i tih si loh chuan hlimna chu a rawn thleng ngawt lovang. Thil tha reng reng hi a thlawna neih mai theih a ni lova, eng emaw kan tih ve a ngai thin a, chumi ti peih leh peih lo te kar chu a hla ta thin a ni.
Nupuiin a pasal a tihhlim theih dan:
1. Ngaihsak la duat rawh. Mipa tam tak hi an nu ten an duat thei em em a, chutiang chu an nupui te lak atang pawhin an beisei thin. A nitin mamawhah te pui la- a kawr hak tur nawh mar sak te, a pheikhawk nawh tlet sak te, a thawmhnaw thleh fel sak te. A zin chhuak dawn a nih chuan a thawmhnaw ken tur leh mutbu te buatsaih sak thin rawh. A office kal tur te pawh thu thlum takin thlah thin la. Mipa tana thil ho te te i tih sak khan a thu hnuaia kun i ni tihna a ni lova, i ‘care’-in i hmangaih tih lantirna zawk a ni.
2. I tan a ‘special’ tih hriattir rawh. Mipa chuan an nupui te nuna mipa pawimawh ber nih hi nuam an ti. Ngaihven hlawh nih an duh a, mahse, chu chu a lang a pauin an sawi chhuak ngai lo. A mood leh hmel put hmang atangin a duh zawng te hriat tum ang che. Hei hi a tirah chuan harsa i ti mai thei, mahse, a bula hun i hman tam a, amah hriatchian i tum phawt chuan i ti thei ngei ang.
3. I pasal chu flirt pui ve zeuh zeuh rawh. A chang changa a bianga han chuk zauh te, awmze nei taka han melh no vel te pawhin mi chu nilengin a tiphur tawh mai dawn a ni. Naute diaper thlak ngai, insuk ngai bawk, eirawng bawl ngai bawk si, chutiang teh nuai kara pasalte han melh no vel chu hman lo i inti pawh a ni maithei. Mahse, hman tum hram rawh, in pahniha hlimna tur a ni.
Pasalin a nupui a tihhlim theih dan:
1. I nupui chu fak rawh. A thil tih te lawmpui thiam la. A tih ve tur renga i ngaih a tih pawhin fak hreh chuang suh. In chhung khur fel taka a enkawl thei te chu fak rawh. Hmeichhia chuan a thil tih te i hriatpui a, a buai dan te i hriatpui tih a hriat chuan a hahdam sawng sawng ang.
2. I nupui chu dah pawimawh thiam rawh. Hmeichhia chuan an pasal nuna hmeichhe pawimawh nih an duh. Atan thil hotz pawh kalsan la, chu chuan lawmna nasa tak a thlen ang. I thil tih turah te rawn ve thin la, a ngaihdan te la thin rawh, chu chuan i tan a pawimawh tih a lantir a ni.
3. A thil tihah pui thin rawh. Tunlaiah hmeichhe tam takin an hnathawh leh in chhung enkawl an fawm kawp tawh a, pasal te puihna tel lo chuan an tan tih vek sen a ni tawh lo. Inchhung sekrek khawihah te tanpui thin la, naupang enkawl thlengin nupui te kuta dah vek mai loin intanpui tawn tur a ni.