Alcaraz a tla hma
Pars Masters khelh mekah champion tura rinkai zinga mi Carlos Alcaraz chuan beisei a phak lova, second round paltlang zo lovin a tla. Alcaraz a tlak hma vangin Novak Djokovic tan No. 1 ni chunga kum khar theihna kawng zau zawkin a inhawng.
World No. 1 Carlos Alcaraz hian Second round-ah rinkai 45-na Roman Safiullin a hmachhawn a, beisei a phak lo hle. Alcaraz lakah tlawm nei tura ngaih Safiullin hian rin loh takin a khel tha ta viau a. Set khatnaah hma taka break a neih a chhawr tangkai a, game thum chauh hloh chungin set a la. Rin loh taka set a hloh hnuin Alacaraz a insiamtha thei chuang lo. Chak let ngei tumin a khingpui nawr bawk mah se set hnihnaah a serve a hum zawh loh a tuar a, game li bak a la thei lo leh a. Rin lawk loh takin Roman Safiullin lakah 3-6, 4-6 in a tlawm a, second round a paltlang zo lo.
Wimbledon-ah ropui taka a champion hnuin Carlos Alcaraz hi a hnungtawlh ta char char a, Paris Open khelh thlengin title lak belhna a nei lo. Inelna hrang hrangah beisei a phak lo ta fo va, ATP Ranking-ah pawh hma a sawn hleithei lo. Paris Open-ah hian champion se No. 1 ni mek Novak Djokovic nen an inkar tizim in, No. 1 ni chunga kum 2023 khar theihna hun tha a nei thei dawn a. Champion a mamawh em em inelnaah a tlak hma vangin Djokovic nen an inkar a tizim thei lova, an inkar a zau leh zual phah thei zawk.
Grand Slam-ah vawi 24 champion tawh Djkovic hian US Open-ah a champion hnuin mimal inelna a hmachhawn zui lo vang vang a. Serbia tan a inlan zawk hnuin Paris Open-ah hian a inlan ve leh tan. Paris Masters-a inlan hmasak berah a khingpui Kecmanovic chu 6-4 6-2 in a hneh nghal. Vawi ruk a champion tawhna hmunah hian a champion leh thei a nih chuan No. 1 ni chungin kum a khar thei tawh tura ngaih a ni. Serb hian No. 1 ni chunga kum a khar thei a nih chuan year end no 1 ni rei ber a nihna tihzau belh ang.
Paris a inelna lianah hian Alexander Zverev leh Hubert Hurkacz ten hnehna changin bul an tan a, an ni pahnih hian ATP Finals khel phak turin beiseina an nei chhunzawm zel. Turin a khelh tur ATP Finals khel turin mi pali; Novak Djokovic, Carlos Alacaraz, Daniil Medvedev leh Jannik Siner te an tling tawh a. Mi dang pali an tlin belh leh ang.