State panga inthlang turte dinhmun

States panga – Madhya Pradesh, Rajasthan, Chhattisgarh, Telangana leh Mizoram-ah te Assembly election hi kumin November ni 7-a neih tur niin December 3 ah vote chhiar a ni dawn a. Heng state pangate dinhmun tlangpui chu hetiang hi a ni:
1. Chhattisgarh : Election hi thawh hniha neih tur niin November 7 leh 17 -ah te neih a ni ang. Bastar thingtlang khaw kilkhawr 40-ah vote thlakna (polling stations) 126 siam niin hei hi inthlan thawhkhatna tur a ni. Tunhma zawngin Naxalites hel ten an tihbuai avang te, venhimna leh a ram awmdanin a zir loh avangin inthlanna an nei ve thei thin lo a ni.
2. Rajasthan – November 25-ah inthlan hi neiin tum khatah zawh vek tura tih a ni. Ningani khan BJP President lo ni tawh Sadhvi Anadi Saraswati chuan Congress a zawm thut avangin BJP chuan hnungtawlh lam an pan a, Saraswati hi Congress Party-in lo lawmin Rajasthan Chief Minister Ashok Gehlot leh Rajasthan Congress In-Charge Sukhinder Singh Randhawa te awm laiin an lo lawm a ni. Congress chuan Ajmer North bialah ding turin an ti nghal.
3. Telangana: Telangana-ah chuan Congress leh Bharat Rashtra Samith (BRS) te chuan Kaleshwaram Project chungchangah thu an la inchuh tawn reng a. Ningani khan Telangana Minister KT Rama Rao chuan Congress hruaitu Rahul Gandhi chu sawiselin ‘hruaitu’ ni lo in ‘chhiartu’ chauh a ni, tiin project chungchanga Rahula sawiselna chu a chhanglet a ni. November Ni 30-ah state election hi an nei dawn a ni.
4. Madhya Pradesh: Congress atanga hel Antar Singh Darbar chuan candidate a nihna chu hnawl phal chuang si loin Dr.Ambedkar Nagar-Mhow assembly constituency ah a ding dawn a. Party atanga bang anga insawi reng tho siin candidate a tum reng tho hian Congress party hruaitu te lawm a ti kim lo a ni.
5. Mizoram: Election nei tura inbuatsaihna chuan a vawrtawp a thleng mek zela, inthlan kaihhnawih-a buaina thar lam engmah hriat a ni lo. November ni 7 hian mipui ten an aiawh tur thlanna an nei dawn a ni.