Djokovic a champion

Djokovic a champion
Pathianni zan khan Paris Masters Final khelh a ni a, inkhel hmuhnawm takah Novak Djokovic chuan a khingpui Grigor Dimitrov a hneh a. Paris Masters-ah a vawi sarih nan a champion.
Djokovic hian vawi 11 an inhmachhawna vawi 10 a lo hneh tawh Dimitrov lakah a khe tha leh viau a, champion phuin a inlan. Set khatna tir lamah an inhnehtawk viau laiin hun pawimawh takah Djokovic hian break a nei. Break a neih a chhawr tangkai a, game li hloh chungin set khatna a la.
Set khatna a lak hnuin Djokovic-a’n a zia a chhuah a, a khel tha tulh tulh. Set hnihna tir lamah Serb hian break a nei zui leh a, game thum chauh hloh chungin set a la zui leh a, 6-4, 6-3 a hnehna changin a champion.
Grand Slam-ah vawi 24 champion tawh Novak Djokovic hi Paris Masters-a champion ngun ber a lo ni tawh a, he hmuna a record a tizau leh zual. Kum 2022 khan final-ah Holger Rune a hneh lova, kum 2023-ah a vawi sarih nan a champion zui leh ta a ni. Paris Masters-ah a champion leh tak vangin ATP Masters 1000-ah vawi 40 a champion tling ta chiah a. Masters 1000-ah champion tam lama amah hnaih ber tu Rafael Nadal aiin vawi li ngawtin a champion tam tawh zawk. ATP Masters 1000 inel na hrang hrang pakuaah champion vek thei awmchhun a ni mek bawk. ATP Masters 1000 ah hian Roger Federer kha vawi 28 chiah a champion.
Paris Masters-ah a champion vangin Djokovic hian No. 1 ni chung a kum tawp khat a hnaih viau tawh a. ATP Finals-ah vawi khat a chak a nih chuan No. 1 ni chungin kum a khar ang.