boruak bawlhhlawh vangin sikul khar dawn

Delhi school te chu November 9-18 inkar chhungin winter break hmangin khar a ni dawn a, hei hi ni ruk zet a zawn zata boruak chhe lutukin a bawh buai tawh vang a ni tiin Directorate of School Education chuan a sawi a. Boruak chhe tak chuan reh lam a pan mai dawnin a lang lo, a ti bawk.
Environment Minister Gopal Rai mai bakah Education Minister Atishi, Transport Minister Kailash Gahlot leh senior Delhi government officials tena meeting an neihnaah thutlukna siam a ni a.
A tlangpuiin winter break hi December-January ah neih thin a ni a, kuminah erawh naupang hriselna ngaihtuahin tih hma a ni ta a. Nov 9-18 holiday chu tih thin dan Dec-Jan break siam thin nen siam rem mai tur a ni bawk.
Rai chuan Delhi school te chu boruak chhiat em avangin physical class neih tir lo turin a ti tawh bawk.
Delhi sorkar chuan boruak chhe lutuk tihziaawm a nih theih nan theihtawp a chhuah chungin awmzia a nei lo hle a. Nimin zing lam khan boruak chhiat lam AQI chu 421 lawih niin a hma aiin a chhe zawk a.
National capital region Noida-ah 409 niin Gurugram-ah 370 a ni thung a. PM2.5 sang lutuk chuan respiratory system khawihin harsatna hrang hrang a thlen thei a ni.
Delhi sokar chuan anti-pollution measures a kalpui mekah Graded Response Action Plan fourth stage kalpuiin chung hnuaiah chuan diesel truck tlan khapin constructiona activity te a khap bawk.
Delhi sorkar chuan vehicle intlanchhawk odd-even rule pawh kalpui leh tur a ti bawk a. Mahse, Supreme Court thupek thutlukna nghah phawt a ni ang tiin Delhi sorkar chuan a sawi.
A hma lawkin Supreme Court chuan air quality crisis chungchangah Delhi, Punjab, Rajasthan leh Uttar Pradesh sorkar te chu chak zawka hma la turin a lo ti tawh bawk.