Office romance

Thawhpui te nena inngaihzawn hi thil awm thei leh awm ve fo a ni a, mahse, fimkhur thiam erawh a tul hle. Relationship lama mithiam ten office khata thawk ho, inngaizawng te tana tih tur leh tih loh tur ni a an sawi te kan rawn tarlang e.
1. Office hna leh mimal thil dah hrang rawh. Office thuhmunah emaw, department khatah emaw kan thawk dun a ni thei, hetiang hunah hian kan hna leh mimal nun thenhran thiam a harsa thin. Mahse, kan rilru sukthlek leh puthmang ten kan hna thawh dan a nghawng tur a ni lo.
2. In inngaihzawng tih chu a theih chen chen thup rawh u. Inthup tul inti kher lo a nih pawhin, a rei thei ang bera tuma hriat loha inkawp chu a tha ber zawk a ni. Thawhpui ten an hriat hunah chuan office titi ber in ni dawn tih hre reng ang che u.
3. Chhe taka inthen loh tur. Inngaizawng te chu an innei lo a nih chuan inthen hun a awm thin, chutiang hunah chuan fimkhur a ngai zual bik hle a ni. Office thuhmuna thawk in ni a, nitin in inhmu dawn tihna a ni. Chuvangin boruak chhe taka inthen chu inpahnih tan office tinuam lo vek thei a ni tih hria ang che.
4. In inngaihzawnna leh i hna chu chawhpawlh hauh suh, chutiangin in inngaihzawnna chu hamthatna dawm tum nan hmang hek suh. Chutianga hlawkna um niawma ngaihtheiha i awm vaih chuan i tan office a nuam lo telh telh ang- i thawhpui ten an hai dawn miah si lo.
5. Nihna inang deuh hlek inngaihzawn a tha. Nang aia hna sang zawk thawk nen in inngaizawng a nih chuan mithenkhat chuan an sawi sep sep dawn che tih hre sa rawh. Chutah eng promotion emaw, duhsakna emaw te han dawng la, i thawhpuite rilru tur chu i hrethiam mai em!
6. Office hung chhungah lo chet meh vak loh tur a ni. In inngainatna leh duhna te chu office compound-ah chuan lantir chiam chiam tur a ni lo, khawi lai kilah emaw, engtin emaw taka in lo khawsa lai an manchhuah palh hlauh che u phei chuan, a zahthlak mai piah lamah a pawi thui thei fu ang!