Tlawng lui lian avanga a kam a lak hek thin venna tur siam mek chu Ningani khan Kolasib bialtu MLA, minister K Lalrinliana chuan a tlawh.
-- Advertisement --
Bairabi khaw chhung, Tlawng kam, tuilianin Mizoram lam a tih chhiat zel tur venna atan ruahmanna siam a ni a. A siam dan tur tlangpui chu, lui kamah mumal taka lung (boulder) rem tur a ni. Kum 2019 atang khan Local Administrative Department (LAD) hnuai ah Blue Hill Engineering chuan tui len dan leh a thil tih chhiat dan a lo zirchiang tawh a. Hemi zulzui hian vaukam ven dan tur ruahmanna siam niin, tuilianin vaukam a tih chhiat tur ven ngai hi km 1.50 vel anga chhut a ni. A thawhkhatna atan hian NABARD kaltlangin phase-1 ah metre 300 vel huam tir phawt tum a ni.
LAD minister K Lalrinliana chuan Tlawng lui lian avanga Bairabi khawtlangin harsatna an tawh thin tihziaawm nan ‘Construction of River Training Works for Protection of Tlawng River at Bairabi Phase-1’ project hi kalpui a ni tih a sawi a. Thawktute kawmin fur ruah thlen hmaa hna chak taka thawh a nih theih nan tan la tura a chah bakah hunbi tuk chhunga hna zo hman turin a hrilh.
Bairabi khua chu ramri hnaiha awm a nih angin sawrkarin kawng hrang hranga tihhmasawnna hna kalpui a ngaipawimawh tih a sawi a. Heng hmasawnna hna thawh tawh leh thawh zel tur hi khawtlang tana rotling a nih theih na’n vilpui leh enkawl hna chu neitu nihna thinlung puchunga kalpui thin turin a chah.
Oil depot changtlung tak bun tumin Bairabi ah hun engemawchen ruahmanna kalpui a nih hnu ah IOCL lamin hmunhma rem leh zau zawk hmundangah an hmuh tak avangin Bairabia IOCL hmun chu inbiakrem hnu ah khawtlang tana hmun tangkaia hman tumin, MLA-LADS sum hmangin khelmual siamna atan ruahman a nih tak thu minister hian a sawi bawk.