Kumina Chapchar Kut lawmna Aizawla neih tura G20 meeting-a tel palaite sawm chungchangah chief minister Zoramthanga hoin Ningani khan Chapchar Kut Organizing Committee hruaitute leh G20 Mizoram Core Committee an thukhawm.
-- Advertisement --
G20 hnuaia committee pakhat B20 meeting chu March 2 hian Aizawlah nghah a ni dawn a. Ram hrang hrang atanga rawn kal turte chu March 1-ah lo thlengin, March 3-a let leh tur an ni. Chapchar Kut Organizing Committee chuan heng delegates hi Kut chhim ve tura sawm nise tiin a rel a, G20 meeting organizer lam pawhin delegate-ten Mizo Kut lian ber an telpui chu tha an ti a. Chumi bawhzui chuan tun meeting-ah hian Chapchar Kut hman dan tur ruahmanna awmsate thlir ho in, siam danglam ngai siam danglam a ni.
B20 meeting neih dan tur leh delegate-te awm dan tur, sawkar inpuahchahna leh hmabak la awmte thlir ho a ni a. Kut lawm dan tur Programme Committee-in ruahmanna a lo siam tawh chu en ho a ni. G20 delegates leh state pawn amiten Mizo hnamzia leh nunphung an temchhin theihna tur, mikhualte lo lawm dan tur leh traffic kal dan tur thlengin sawi ho a ni. Heng mikhualte avanga sum sen belh mamawh chu ruahmanin, a remchan anga sawrkar laipuia dil nise an ti.