UFC ah champion thar pahnih

Pathianni zing khan Madison Square Garden-ah hlawhtling takin UFC 295 neih a ni a, champion thar pahnih an awm. Palian huanga champion lailawk (interim champion) nih inchuhnaah awlsam takin Tom Aspinall a chak a. Light-heavyweight kawnghren inchuhnaah Alex Pereira chuan knockout in hnehna a chang ve bawk.
Palian huangah hian champion lai chu Jon Jones a ni a, Stipe Miocic nen kawnghren inchuh tur an nih laiin hliam a tuar a, a inlan mai thei rih lo. Jon Jones a chawlh rih a ngaih dawn vangin palian huanga kawnghren lo hreng lai lawktu tur zawnna neih a ni a, palian champion nih tumin Tom Aspinall leh Sergei Pavlovich te an inhmachhawn.
Palian champion lai lawk nih inchuhnaah hian inngam takin an innawr nghal a, an che vel pawh a zangkhai hle. Fight tan atanga minute khat a liam awrh tihah Tom Aspinall chuan a khingpui Sergei Pavlovich a hnek tlu a, rang taka bawhzui nghalin a hnek tlawm zui nghal a, palian champion thar a ni ta a ni. Kawnghren chuh turin Aspinall hian hun a nei tlem hle. Kar hnih leh a chanve chauh inbuatsaihna hun nei chunga inlan ni mah se awlsam takin hnehna a chang ta tho a, hei hian fighter tha a nihzia a pho lang chiang viau a ngaih a ni. Palian champion lai lawk Aspinall hi British UFC title la thei pathumna a ni a, Michael Bisping (middleweight) leh Leon Edwards (welterweight) te hnung a zui.
UFC 295 a fight ngaihven hlawh berah Alex Pereira leh Jiri Prochazka ten hrengtu nei lova awl mek light-heavyweight kawnghren an inchuh a, fight hmuhnawm takah middleweight champion hlui Pereira chuan second round ah a khingpui a hnek tlawm a, champion thar a ni. Pareira hi UFC-ah division hniha champion kawp thei pakuana chiah a ni a, light-heavyweight ah hian vawi hnih a inlanna chiah ni mah se World Champion a ni zui ta tho a ni.