KVK leh loneitute hun hmang

KVK Khawzawla thawktute chuan Rabung khuaa tomato chingtu chhungkua 30 nen Ningani khan Phunchawng, Kangfim leh Khumzawl zauah Field Day an hmang.
He hunah hian KVK Khawzawl senior scientist & head Dr Malsawmkimi, subject matter specialist (Agronomy) Rambuatsaiha, leh subject matter specialist (Soil Science) R Vanlalduati te chuan tomato chingtute tana pawimawh hrang hrang an zirtir. Rabungah hian kum 2021 atangin tomato an ching tan tawh a, KVK-a thawktute hian zirtirna pe thinin, tomato chi Arka Abhed leh Arka Samrat hi KVK Khawzawl-in IIHR-NEH scheme hnuai atanga a pek a ni. Rabung khua hian tomato hi an seng mek a, quintal 500 an seng tawh.
KVK hian kum 2015 khan Tuipui khuaah fur laia tomato chin hi bul an lo tan tawh a, Khawzawl district-a khaw hrang hrang – Tualte, Chawngtlai, Neihdawn leh Khawhai-ah zirtirna pein tomato an ching chho tan a, tomato chin kawnga harsatna an tawh leh mamawh ang zelin KVK hian zirtirna an pe thin a ni.