Kumin January thla tir lama Zoram Medical College endika lo kal National Medical Commission (NMC) member-te chuan Zoram Medical College chu NMC pawmpui institution ni turin duhkhawp lohna a la awm nual tih an sawi a. Tehfung hrang hrang zingah infrastructure lam chu pawm theih a nih laiin, zirtirtu (faculty) bakah staff nurse leh demonstrator lamah duhkhawp lohna a la awm, an ti a ni.
-- Advertisement --
Kan hriat angin, medical college neih ve theihna tura Mizoramin kawng a zawh hi a thui ve fat fat hle mai a. A tawp a tawpah kum 2004 khan Ministry of Health & F.W.chuan min pawmsak a. Chumi hnu kum sawm nufa a han ral leh meuh chuan harsa takin medical college hming pu chu kan nei ve ta ran a. State dangin mahni state puala medical college sawmhnih sawmthum an neih fur tawh laia medical college pakhat kan han sual chhuak ve phawng mai hi kan lawm tlang a ni ber e.
Kum 2018 atangin Mizoram chhungah MBBS zir tur 1st batch te chuan class an han kal ve tan ta a. A hnu lawkah pandemic-in min han nuai zui a, hei hian medical college thuam that zelna kawngah nasa takin khawlhkham a siam ang tih a rin theih a, chuti chung chuan infrastructure lamah medical college pawmtu ber NMC mit a tlung thei hi a lawmawm hle, tih loh rual a ni lo.
Chutih laiin, tuna duhkhawp lohna point hrang hrangte hi Mizoram sawrkar pawhin a ngaihtuah ran a pawimawh dawn hle tih a hriat a. Kha leh chen harsa tak chunga medical college neih tuma lo beihna zawng zawng kha, tuna NMC te thil phut kan tlin loh avanga ‘pawmpui loha awm thei’ a nih avangin leh, MBBS zir mekte tan pawha an hma lam huna harsatna nasa tak thlen thei a nih avang te, a mualphothlak dawn avangte pawhin, he duhkhawplohna lai hnawh ping tur hian Tha Pui chhuah a pawimawh tih hrechiangtu ber chu sawrkar leh medical college lama mawhphurtute an ni a. Medical college nei ve si, recognise theih lohva ‘class hniam’ a nih leh si chuan thil mualphothlak tak a ni ngei ang.