Telangana inthlanah Cong leh BRS inbei ang
Telangana Assembly election neih turah thil chiang taka lang awm tain political party tena candidate an siam atangin Telangana-ah chuan constitutency thenkhatah chuan thuang thuma inbeihna a thleng ang a. A tam zawkah erawh rorel lai Bharat Rashtra Samiti (BRS) leh Congress te chu inbei ber tura ngaih an ni.
Ruling BRS te chuan seat 119 an chuh vek dawn a, Congress-te chuan seat 118 an chuh ang a, Kothagudem seat chu an alliance partner Communist Party of India (CPI) te an kian thung. BJP te chuan constitutency 111-ah candidate an siam a, seat kua dangte chu an alliance partner Jana Sena Party (JSP) te kutah an dah thung a. Bahujan Samaj party (BSP) te chuan seat 107 an chuh ang a, CPI (Marxist) ten seat 19 an chuh thung ang.
|huang thuma inbeihna
BJP te chuan constituency 40 velah awmzia an nei theia ngaih a ni a, a bak zawng seat 79 te chu BRS leh Congress te inbeihna tura ngaih a ni. |huang thuma inbeihna hi BJP tena thlawptu an ngah ve deuhna hmun Nizamabad, Karimnagar, Adilabad, Greater Hyderabad, Mahbubnagar, leh Warangal district ah te a ni deuh ber.
Communsit party te chu Khamam leh Nalgonda district ah te an awm tam avangin heng hmunah te hian thuang thuma inbeihna a thleng thei a, mahse chungah chuan BJP te chu eng tham an ni leh lo thung. Adilabad district-a Sirpur Kagaznagar seat-ah chuan BRS leh Congress-te chuan IPS atanga politician-a inlet BSP State chief R.S. Praveen Kumar chu an elpui a ni dawn a. He district vek hi Scheduled tribe-te tamna niin Khanapur, Boath leh Mudhol-ahte pawh BRS leh Congress-te an inbei ber dawn a, Nirmal constituency-ah erawh BJP-te an langsar ve thung.
Kamareddy-ah Chief Minister K. Chandrashekar Rao a din dawn avangin a thenawm Nizamabad district chu a nghawng lo thei lo bawk a. Heng hmunah hian Congress-te chuan State party chief A. Revanth Reddy an dah a, BJP-te pawhin harsatna an siam theihna a ni tho bawk. BJP-te chu Armoor, Bodhan, Nizamabad Urban, Banswada, leh Balkonda constituency-ahte an lian bawk.
BJP nghawng
Karimnagar district-ah thuang thuma inbeihna thleng dawnin, BJP-te chuan an MOP ni lai Bandi Sanjay leh Dharmapuri Arvind-te an dah a, chu chuan party cadre-te a tiphur tura ngaih a ni a. Heng bakah hian Karimnagar, Korutla, Jagityal, Vemulawada, leh Huzurabad-te chu BJP te awmze neih theihna anga ngaih a ni.
Huzurabad ah hian kum 2020 khan bypoll neih niin Eatala Rajender chu Chief Minister-in Cabinet atanga a paih hnuah BRS chhuahsanin BJP a zawm a, State sorkarin theihtawp a chhuah chungin a tling zui ta tho a ni.
CPI(M)-in vote tidarh thei
Khammam district chu BRS leh Congress inbeih bikna tura ngaih niin mahse CPI(M) chuan party pahnih vote share an titlem thei thung. CPI(M)-te hian last minute thlengin Congress nena alliance siam an tum a, mahse an hlawhchham a ni.
Congress chakna Nalgonda-ah pawh third party CPI(M) ten vote an tidarh viau thei a, tichung chuan Congress leh BRS inbeihna ber tura ngaih niin, mahse Suryapet constituency-ah erawh BJP candidate chu tling thei ber tura ngaih a ni thung.
Mahbubnagar district-ah chuan BRS chuan chakna an chang ngei tura ngaih a nih rualin Congress-in hma an sawn chak hle tih a ni thung.
Greater Hyderabad-ah pawh thuang thuma inbeihna a awm ang a. All India Majlis-e-Ittehadul Muslimeen (AIMIM), BRS leh BJP te an inbei ber tura ngaih a ni a. Congress chuan kum 2014 inthlan hnu khan an hruaitu lawkte BRS lamah an hloh avangin an tha lova ngaih a ni thung.