Buh thar tlemnain ram heh zawk Leileta siam theih Ha 74,644 atangin 21.44%

On Nov 22, 2023 9 0

Mizoramah thingtlang loneih atanga buh thar chhuah aiin leilet atanga buh tharchhuah a tam zawk a; chutih laiin leilet aiin thingtlang lo-in ram a heh zawk thung.
Kum 2020-2021 khan thingtlang lo hectare 18,899-a zau siam a ni a, buh metric tonne 23,744 tharchhuah a ni. Hemi kum vek hian leilet hectare 16,008-a zau atangin buh metric tonne 37,137 tharchhuah a ni bawk a. Leilet atanga buh thar a tam zawkna hi metric tonne 13,393 a ni. Buh tharchhuah zawng zawng atanga 61% chu leilet atanga tharchhuah a ni a, thingtlang lo atanga tharchhuah chu 39% a ni ve thung.
Hei hi Economics & Statistics department-in a tihchhuah thar ber statistical handbook 2022 atanga lakchhuah a ni.
Thingtlang lo atanga buh thar chhuah hi hectare khat zelah Kg 1256.36 a nih laiin, leilet atanga buh tharchhuah chu hectare khat zelah Kg 2319.90 a ni ve thung. Thingtlang lo atanga buh tharchhuah leh leilet atanga buh thar chhuah hi chawhrualin hectare khat zelah Kg 1744.09 ang a ni.
Kum 2021-22 chhung hian a hma kum aia thingtlang loneih tlakhniamna chu hectare 181 a ni a, leilet a pun phah lo va, leilet hi hectare 158-in a tlahniam ve bawk.
Mizoramah leilet siam theihna ram awl hectare 74,644-a zau a awm mek a, tun dinhmun (2021-22) ah leilet zau zawng hi hectare 16,008 a ni a, chu chu 21.44% a ni; leileta siam theih ram awl tha hi tun dinhmunah hectare 58,636 a la awm.
District hrang hrang zingah Mamit district-in leilet atana siam theih ram awl (potential area) a nei zau ber a, hectare 20,182 a nei a, heng zinga hectare 820 (4.06%) chauh leileta siam a la ni. A dawtah Lunglei district-in potential area hectare 12,797 a nei a, leileta siam zat chu hectare 857 (6.69%) a ni. Potential area nei tha pathumna chu Lawngtlai niin hectare 11,405 a nei mek a, leilet atan hectare 2,486 (21.79%)a zau siam a ni.
Leilet atana potential area nei tlem ber Serchhip chuan leilet a siam zau ber ve thung a, hectare 3,710 atangin leilet hectare 2,389 (64.39%) a nei a. Leilet nei zau pahnihna chu Kolasib niin hectare 9429 atangin leilet hectare 4,276(45.36%) a nei a; pathumna chu Champhai niin hectare 8,697 atangin leilet hectare 3,714(42.7%) a nei a ni.
Kolasib district-ah leilet siam an tam ber a, chhungkua 3,887 an awm a, a dawtah Champhai niin chhungkua 3,376 an awm a, Lawngtlai chu a pathumna niin chhungkua 2,260 an awm a, Serchhip-ah chhungkua 2171 awmin palina an ni.