Cher i duh chuan ei muang rawh!
University of Rhode Island (URI)-a mithiam te chuan intih cher kan duh chuan muang changa chaw ei tur niin an sawi a, chaw kan ei chak lutuk chuan kan ei hnem bik niin an sawi bawk.
Zirchianna neitu te chuan a tlangpui thuin mipa ten hmeichhia aiin chaw an ei chak zawk a, mi thau ten micher te aiin an ei chak zawk bawk.
URI-a professor of nutrition Kathleen Melanson leh a team ten zirchianna an neihah chuan chaw ei chak te chuan minute 1-ah chaw gram 87.8 vel an ei hman a, medium speed eater ten gram 70.8 vel leh chaw ei muang ten gram 56.6 vel an ei hman angin an chhut a ni.
Hei bakah hian eating rate leh body mass index (BMI) inzawm dan te pawh an zir a, BMI sang te chuan BMI hniam te aiin chaw an ei chak zawk tih an hmuchhuak niin an sawi bawk.
Chaw kan ei hian kan taksain kan puar tawh tih min hrilh turin hun a duh ve deuh a, kan ei chak lutuk hian kan taksain kan puar tih a hriat hmain kan mamawh aia tam kan lo ei hman ta thin a ni.
He zirchianna chungchang hi The Obesity Society in Orlando annual meeting-ah chhawpchhuah a ni.