Mensa member naupang ber Isla McNabb

Mensa International chu hlawkna um lo pawl, khawvela mi thluak tha awm khawmna niin, IQ test-a 98 percent hmu chin chauh tel theihna a ni a, khawvela hetiang lam pawl lian ber a ni. Chu pawla tel thei naupang ber chu hmeichhe naupang kum hnih mi, Isla McNabb, Crestwood, Kentucky, USA a cheng a ni. Isla hian IQ test (Stanford-Binet Intelligence Scales)-ah 99% a score hnuah he pawl hi a zawm ve ta a ni.
Isla hi nausen a nih lai atangin a danglam riau niin a nu leh pate chuan an sawi a, mahse, thil a zir tan atangin a danglamna an hmuthiam tan ta chauh a ni. Kum a tlin chuan Isla hian rawng chi hrang hrang a hre hrang tawh a, number leh hawrawp thlengin a zirthiam der tawh.
Isla pa, Jason McNabb chuan, “Thla sarih chauh a nih laiin milem bu atangin kan thil zawh chhan nan thil thenkhat chu a thlang thiam tawh,” a ti.
Isla hi thla 18 a nih chuan alphabet a zirthiam tawh a, kum hnih a tlin chuan lehkha a chhiar thei der tawh. A kum hnih tlin champha lawmnaah pawh a nute Crystal-i chuan Isla hi thil ziahna nawhreh theih a present a, chutah chuan a pa Jason chuan ‘red’ tih thumal a ziak a, Isla chuan a chhiar thiam tawh tlat! Mak an ti hle a, chutah Jason chuan “blue,” “yellow,” “cat,” leh “dog,” tih te a ziak leh a, Isla chuan harsatna nei lovin a a riin a chhiar thei vek!
Isla nu leh pa te chuan an in chhungah rawng chi hrang hrang hawrawp lem inrem dik thlap thlap an hmu ta fo mai a, an thutthleng bulah C-H-A-I-R tih leh S-O-F-A tih lo inrem te, an zawhte bula C-A-T tih lo inrem te an hmuh chuan Isla nu Amanda chuan an fanu test ngei thaa hriatna a nei ta a ni.
Tichuan, naupang thluak tha bik te enkawlna lama mithiam, psychologist an pan ta a, ani pawh chuan naupang kum hnih vel bawr te chu a lo la test ngai bik hauh lo! Kum hnih leh a chanve a tlin hma deuhin Isla chuan Mensa membership a nei fel ta ran mai a ni.