Vawk vulh khuahkhirhna dan January 15 atangin tan dawn

Aizawl khawpuia vawk vulh duh tan mihring chenna in atanga feet 100 aia hnaia vulh theih a ni tawh dawn loa, kumthar January 15 atangin hei hi hman tan a ni ang.
Aizawl Municipal Corporation hotute leh Aizawl City Local Council Association (ACLCA) hruaitute Thawhlehnia thukhawm chuan Aizawl khawpui chhunga vawk vulh chungchanga inkaihhruaina dan an enho a. Kumin June 28-a AMC Board of Councillors thukhawmin thutlukna a lo siam tawh angin, Aizawl khawpui chhung a thianghlim a, mipui kan hrisel zawk nan leh leimin vanga chhiatna thleng a tlem zawk theih nan mihring chenna in atanga feet 100 aia hnaia vawk vulh chu 2024 January 15 atangin khuahkhirh a ni dawn.
Aizawl mayor Lalrinenga Sailo kaihhruai thutkhawmah hian executive corporators, Municipal commissioner, officer dangte leh ACLCA hruaitute an tel a. AMC-in vawkvulh chungchanga inkaihhruaina dan a duan chu sawiho niin, member-ten tha an titlang a ni. Aizawl khawpui chhunga vawk vulhtuten vawkvulh kawnga inkaihhruaina dan zawm theuh turin AMC leh ACLCA chuan an ngen a ni.
Vawk vulh chungchanga harsatna bik nei chuan local council atanga phalna la in AMC-ah ngaihnatthiam dil theih a ni ang.