Rihdil mawnga lutin a thuk zawng an teh

Mizo thalai ten adventure sports lama kan hriat lar, a YouTube channel-a hetiang lam video hmuhnawm tak tak upload thin PC Lalnunzira (Zira PC) chuan a thian mi pahnih te nen Rihdil mawnga luta, dil thuk zawng an teh dan vel video a YouTube channel-ah a upload a, an teh dan chuan he dil thuk zawng hi metre 12.3 (feet 40) a ni.
Rihdil li mawnga luta a thuk zawng teh tur hian Zira PC bakah Darthantluanga (Thantea), Sairang leh Dr. Lalmuanpuia, Bawngkawn te an kal a, December ni 9 khan Rihdil-ah hian kalin, a lai tak awm velah lawnga inkar lutin, chuta tang chuan tui chhung luhna thuam famkim nen dil chhungah hian an lut ta a ni.
Rihdil-ah hian Thantea lut hmasa berin, ani hian a mawng a thleng a, a mawng atangin lei a hum chhuak bawk a, tui chhung lut miten an hman thin, tui thuk zawng tehna hmanga an teh dan chuan an luhna lai hi meter 12.3 (feet 40) a thuk a ni a, hei hi hman deuha LPS-a Special Report ti thin Pu Vana ti a hriat lar ten an teh dan nen pawh a inzul viau a, anni hian lawng atanga hrui thlakin dil thuk zawng hi an teh ve thung a ni.
Tun tuma an tehna hmanrua hi tui chhung lut mi ten an hman thin dive computer a ni a, hei hi khawvel huap pawha an hman thin leh, dik tawk tura ngaih a ni. Zira chuan Rihdil thuk zawng chu an rin dan ang vel tho a nih thu sawiin, “A tui hi a luan chhuahna hmuh tur a awm lo va, tlangin a hual vel a ni a, tui a luang lut ve reng thung a, chu chuan leinawi a len lut ve reng dawn a, chuvangin a thuk lo ve telh telh thei a ni,” a ti.
Zira chuan Rihdil lut tur hian an inbuatsaihna a rei tawh niin a sawi a, hetiang thil an tihna chhan sawiin, “Rihdil hi kan history-ah a pawimawh a, chanchin pawh a ngah a, thawnthu chi hrang hrang pawh a tam. Mahse, chian lohin a awm reng a, chu chu Mizo thalaite hian kan tih tur niin kan hria a, chumi rilru chuan kan lut a. Kan thawnthu hrang hrang te a dik lo e tih tuma fiah tumna lam a ni lo va, kan history a pawimawh tak a nih avanga hriatchian lehzual kan duh vang a ni,” a ti.
Rihdil hi Myanmar ram chhunga awm a ni a, tunlaiin tual chhung indona avanga buai mek an ni a, Zira te thianho pawh hi CDF sipai ten an lo buaipui a, hetianga buaipuitu tha tak an nei hi lawmawm an tih thu an sawi.
He dil hi hriat theih chinah a mawng rap tawh hi an awm thawm hriat a la ni lo va, anni thian thum te hi he dil mawng rap hmasa ber ni a hriat an ni. Rihdil hian chanchin leh thawnthu chi hrang hrang a ngah hle a, hetiang avang hian tui chhunga luh pawh hian a zamawm duh ru ve viau ngei ang. Zira chuan, “Kan puitlin thei hi kan lawm lutuk. Kan hlawhtlin theihna bul ber chu Pathian kaihhruaina avang chauh a ni,” a ti.
Rihdil mawng hi a fai ang reng hle niin an sawi a, Zira chuan, “A thim chhah vek turah kan ngai deuh a, mahse, rin ai takin a eng zawk a, tui chhungah pawh kan kal kual ve viau a, a nuam ve khawp mai. A mawngah hian patek leh hnawmhnawk tam tak awm tura ngaih ang kha a ni lo a, dum a ni mai. A mawngah kha chuan tui mi delh kha a na ve tawh khawp mai,” a ti.
He dil mawnga lut tur hian tech diver Thantea tui chhung luhna hmanraw chi hrang hrang bakah midang ta man chawia an hawh khawm te an hmang a ni.