Tom Cruise film premiere-ah Kate Middleton lal chhungkaw tlereuh nen

Sap lal mo, Kate Middleton chu a pasal Prince William nen London-ah Tom Cruise channa film thar ‘Digger’ premiere-ah an kal dun a, Kate-i hian lal chhungkaw tlereuh zinga mi, thi, amethyst sautoir a awrh chhuak a, he thi hi kum 103 a upa a ni a, tun hi 2012 hnua mipui hmuh tura an awrh chhuah lehna hmasa ber a ni. He thi-ah hian heart-shaped pendant, lunghlu a chei a awm a, a thi mil turin Kate-i hian kawrfual purple a ha chhuak bawk.
He thi hi Queen Camilla-i’n 2012 khan a awrh chhuak a, chutih lai chuan Duchess of Conrwall title a la neih lai kha niin, Camilla pawh hian film premiere-naah tho a awrh chhuak a, James Bond film, Skyfall premiere-ah , velvet, off-shoulder evening gown nen a chhuahpui a ni.
He thi hi an inrochun nual tawh a, a tirah chuan Lady Elizabeth Bowes-Lyon (a hnuah chuan Queen Elizabeth) hnenah 1923-a Queen Alexandra-i’n a present a ni a, a hnuah Alexandra fapa Prince Albert (a hnuah King George VI) nen an inneihnaah pawh Buckingham Palace-ah mipui en theih turin dah chhuah a ni.
Kate-i hian lal chhungkaw tlereuh hlu tak tak hi a inbel chhuak nual tawh a, 2023 khan Strathmore Rose tiara khim chhuakin, kum 90 hnuah mipui hmuh tura an khim chhuah leh hmasak ber a ni. Hei bakah hian lal chhungkaw tlereuh zinga mite ngaihven hlawh tak Lotus Flower tiara pawh lal chhungkuain an khualtha te ruai ropui an theh saknaah tum thum- 2013, 2015 leh 2022-ah te a khim chhuak tawh bawk.