Taylor Swift ‘Eras Tour’-in record a siam

Guinness World Record-in a tarlan danin Taylor Swift-i’n Eras Tour a neih atanga a sum hmuh chu dollar tluklehdingawn a tling a, zaithiamin tour atanga a sum hmuh tawhah chuan a la tam ber niin December ni 12 khan an puang.
Eras Tour atanga Swift, kum 33, sum hmuh hi dollar tluklehdingawn 1.04 a tling a, a tour hi kumin March atanga a tan kha niin, November thlaah a zo hman a, thla kaw chhung chiah a tour a, Bloomberg phei chuan October thla khan Swift hi billionaire-ah an lo puang tawh nghe nghe a ni.
Taylor Swift hmaa zaithiam zinga tour atanga sum lalut hnem record siamtu chu Elton John niin, ani hian a farewell concert series atangin kum nga chhungin dollar maktaduai 939 a lalut a, a tour chu July thla khan Sweden-ah a khar tawh a ni. Elton John-a’n kum nga chhunga record a siam chu Swift hian thla 9 chhungin a rawn khum ta a ni.
Taylor Swift hian Eras Tour hi North leh South America lamah duhtawk rihin, kumin atan chawl tawh mah se kum tharah a la chhunzawm leh dawn a, February 2024-ah Tokyo-ah bul tanin, Australia, Singapore leh Europe te a fang kual zel dawn a, Eras Tour atanga a sum lakluh hi a la pung leh ngei dawn a ni.
A sum lakluh chungchang sawi takah chuan Taylor Swift hi tanpuina lamah pawh a luang chhuak nasa thin a, tunah pawh thlipuiin a nuai Tennessee a chhiatna chi hrang hrang tawk te chhawmdawl nan Community Foundation of Middle Tennessee-ah dollar maktaduai khat a chhung lut leh ta a ni. Swift hian March 2020-ah pawh khan Middle Tennessee Emergency Response Fund-ah dollar maktaduai khat a lo chhung lut tawh bawk a ni. Hei bakah hian tun tuma Eras Tour a neihnaah Santa Clara, California a tlawh tumin, July ni 29 khan The Second Harvest of Silicon Valley Food Bank hnenah sum thahnem tak a thawh a, a sum thawhna pawl hian Santa Clara leh Mateo county-a mi 5,00,000 vel tana thla khat ei tur leina khawp a thawh niin an tarlang. Eras Tour a neihnaah truck driver mi 50 te hnenah pawh bonus dollar 1,00,000 theuh a lo pe tawh bawk a ni