Swift-i’n kum khat chhungin $2B dawn a lalut

Company tam takin kum khata revenue dollar tluklehdingawn 1 neih theih an chak em em laiin, Taylor Swift chuan amah chauhin chu aia tam daih chu kuminah a lalut tlat mai.
Billboard-in an chhut danin Taylor Swift hian 2023-ah music sales leh royalties, concert ticket hralhna leh concert-naa merchandise hralhna leh a concert movie ‘Taylor Swift: The Eras Tour’ ticket hralhna atangin December ni 7, 2023 thleng khan dollar tluklehdingawn 1.82 vel a lalut thei a ni.
Billboard-in an chhutna hi a langsar china Swift-i sum hmuhna te a ni a, chutihrualin heng a sum hmuh zawng zawng hi ama puala a neih vek tur a la ni lo thung. Heng bakah hian sponsorship leh merchandise sales dang atanga a sum lakluh nen chuan dollar tluklehdingawn 2 a tlin theih hial an ring a ni.
Swift kum khat chhung sum thawh chhuah anga an chhut, dollar tluklehdingawn 1.82 a sum hmuh theihna zawng zawng atanga chhut a ni lo va, a chhan chu data thenkhatah an tlangzarh lem loh a tam a, a music advertisement atana an hman te, film leh television show, sponsorship leh a website kaltlanga merchandise sales leh licensing deal-te pawh chhut tel a ni lo.
Billboard chuan a tlem thei ang bera an chhut pawhin, kumina Taylor Swift sum thawh chhuah hi dollar tluklehdingawn 1.8 chu a tling hrim hrim niin an ngai a, kumina a sum hmuhna lian ber chu The Eras Tour ticket hralhna niin, heta tanga sum lut hi dollar maktaduai 900 vel a tling. Swift hian US-ah kumin hian concert vawi 53 neiin, ticket maktaduai 3.3 vel hralh angin an chhut a, chawhrualin ticket pakhat hi dollar 250 man ang zel a ni. Hei bakah hian Latin America-ah show vawi 13 a nei bawk a, hetah hian ticket 7,50,000 a hralh leh bawk. Heng a concert-naah hian amerchandise sales ringawt pawh dollar maktaduai 132 a tling angin an chhut, vawi khat concert-naa merchandise sales hi chawhrualin dollar maktaduai 2 ang vel zel a ni.
Streaming royalties, a hla, digital album, CD, LP leh cassette hralhna bakah broadcast radio play atangin Swift hian kumin dollar maktaduai 536 vel thawk chhuak angin an chhut bawk. A concert movie pawhin cinema hall ticket hralhna atangin dollar maktaduai 250 chuang a lalut thei a, a film siam nan hian dollar maktaduai 20 pawh a seng tling lo!