Manifesto-ah designation plate tar loh sawi tawh lo

018 MLA inthlanpuia ZPM party manifesto-a ‘designation plate’ tar loh chungchang chu a taka thil tih chi nia an hriat loh hnu ah kumin MLA inthlanpuiah chuan manifesto ah an telh tawh lo tih ZPM leader, chief minister Lalduhoma chuan a sawi.
Assembly Session-a eptu member-te thusawi a chhannaah designation plate chungchangah 2018 inthlanpuiah ZPM manifesto-ah an dah a, manifesto hi sawrkar siam huna hman tur a nih laiin, an sawrkar ta lo tih a sawi. Khatihlaia manifesto-a an dah chhan kha, an sawrkar chuan ‘VIP culture’ tihtlemna tur zinga pakhata an dah niin, an party MLA leh minister-te chauhin an zawm bik tur niloin, Mizorama MLA zawng zawng zawm tlan tura dah an ni tih a sawi.
“A taka thil thleng an enin, MLA leh minister te hi kan vakchhuak hnem a, chhiatni thatni, damdawi in kal leh meeting ah te kan tel a, session-te a lo ni bawk a, lirthei intlanchhawk nen, hei hi chu a fuh chiah lo a ni tiin, tun 2023 inthlanpui manifesto-ah hi chuan kan telh tawh lo,” a ti.
School upgradation chu inthlan dawn hnaia upgrade a tam thin a, vote zawn nana ngaih a hlawh duh a. A tak taka implement a har leh si avangin eptu lama an thut lai pawhin an nawrpui thin a, sum dinhmunin a tlin em tih ngaihtuah loa vote zawn nan hman thin a ni tih Lalduhoma hian a sawi. Engpawh nise sawrkar hmasa in school a upgrade thar kha hman nghal tur ni loin, kum hnih hnua effective chauh tura tih a nih angin, kum hnih chhung chu tun sawrkarin a lo ngaihtuah ve phawt dawn tih a sawi a ni.