Airport leh ZMC midang kutah Kuhvaah hma lak nghal turin ti

Council of ministers chuan Lengpui Airport chu Airport Authority of India hnena hlan turin a ti a. Zoram Medical College chu sawrkar laipui kuta hlan a tum. Dan loa kuhva ro phurh thin chu titawp turin hma lak nghal turin a ti bawk.

Mizoram sawrkar thar hnuaia Council of Ministers thutkhawm hmasa ber Nilainia chief minister Lalduhoma kaihhruaia neiha an thu pawm zingah Lengpui Airport chu AAI hnena hlan turin hma lak a ni anga, Zoram Medical College pawh sawrkar laipui kuta hlan tura hma lak a ni ang, tia dah a ni.
‘Dan loa kuhva ro phurhkual velna titawp turin a tulna apiangah hma lak nghal tur a ni,’ a ti a. Sawrkar hnathawkte mimal hna thawhtir (misuse of govt. servant) khap a ni, tih rel a ni.
Model code of conduct (MCC) nun hmaa work order tihchhuah tawh leh hnathawhna tur hmuna hna lo thawh tan tawh chu an hnathawh lai chhunzawm phalsak an ni a. MCC nun tawh hnua hnathawh tan erawh stay niin, work order nei/ awm hmasa loa hna lo thawk tan pawh stay a ni, an ti.
SEDP zirtirtute chu sawrkar kum kal mek (2024 March 31 thleng) thawh chhunzawm tir remtih a ni a. Thla hnih chhungin thil pawimawh chinfel ngai chingfel tura tih niin, SEDP hnuaia non-teaching staff te chu an hna tihtawp sak nghal an ni.
Sawrkar pisaa zu leh ruihhlo lam chi reng reng tih (consume) khap bur a ni a. Sawrkar pisa hi venhimna mumal tak siam a, fai taka enkawl tura tih niin, CCTV hman theiha awmtir tura tih a ni. Biometric attendance system chu department tina hman tur a ni a, Secretariat-ah a bul tan tura tih a ni.
Resource Mobilization department chu thiah/ tih tawp a ni, an ti a. Dik lo taka an license hmangtu fertilizer dealer-te license titawp sak tura hma lak a ni dawn tih a ni.
Sawrkar department zawng zawng chu sawrkar laipui kaltlanga hna an thawh mekte pending issues, projects and proposals an neih zawng zawng sawifiahna lehkha December 19 hmaa Planning & Programme Implementation department-a thehlut tura tih an ni a. The Mizoram Right to Public Services Act 2015 chu awmze neia kalpui turin department tinte hma la nghal tura tih an ni.
Sawrkarin ni 100 chhunga tih tur a duan, a thawktu department-te hnathawh dan viltu tur Monitoring Committee siam a ni a, GAD chu nodal department a ni. Sawrkar kum thar (2024- 2025) budget-ah thlai thar leina turin cheng vaibelchhe 150 dah a ni anga, sawrkar kum thar budget-ah hand holding (bana kaih) policy atan finance-ah budget dah a ni ang.
Department hrang hrangin solar panels an hman chu tangkai lehzuala hman a nih theih nan Power & Electricity department-in a vil anga; empanelment of consultancy firms chungchang chu Council of Ministers thutkhawm leh hmasa bera pharh tura tih a ni.