MLA tling thar MZP hruaitu hlui lawmpui

Mizo Zirlai Pawl chuan Zirtawpni khan MZP hruaitu hlui MLA tlingtharte lawmpuina a hmang a. Kumin atan MZP Pisapui an khar nghal.
MZP Gen. Hqrs. president H Lalthianghlima chuan pisapui khar mah se, zirlaite leh ram leh hnamin an mamawhnaah chuan engtik lai pawhin an che reng dawn tho a; engtik lai pawhin hawn theih a ni, tiin a sawi. “MZP chu zirlai mangang, puih ngaite puitu nih zel kan tum a. Ram leh hnam leh zirlaite innghahna tlak ni zel turin theihtawp kan chhuah a ni” a ti.
MZP hruaitu hlui MLA tlingtharte a lawmpui tih sawiin, an kalzelna turah duhsakna a hlan tih a sawi bawk.
MLA inthlanpui neih zawh taka MZP hruaitu hlui hlawhtlinna chang tharte lawmpuina hlanin thuziak leh Tawlhloh puan hlan an ni. Lawmpuina hlan zingah CM adviser (Political) a ruat thar Lalmuanpuia Punte hi 1993-1995 leh 1996-1997 inkar khan MZP president a ni a; leader of opposition Lalchhandama Ralte hi 2001-2003 chhung MZP president a ni a, MLA Lalrinsanga Ralte hi MZP Executive Committee member ni tawh a ni.