Israel ten hamas leiverh lian ber hmuchhuak

Israel sipaite chuan Gaza Strip-a Hamas te leiverh lian ber an hmuhchhuah thu sawiin border crossing atanga metre za li vel leka hnaia awm a nih thu an sawi bawk.
Leiverh chu lian hlein vehicle te chi chu a tlan thei var var tiin an sawi bawk a, leiverh hi journalist-te an fanpui bawk a ni.
He leiverh hi Hamas tena awmze nei taka network kilometre li chuang lai inthlunzawm veka an siam zinga mi a nih thu sawiin Erez border crossing atanga 400 metres vela hlaa awm a ni, an ti bawk a.
Leiverh hetiang anga lian leh tha siam tur hian dollar maktaduai tel leh a kum tel a ngai ti bawkin Israel sipaite chuan heng project te hi Hamas chief Yahya Sinwar unaupa Mohamed Yahya, October 7 a Israel beiha mastermind-tu hmalakna tiin an sawi bawk.
Leiverh chhungah hian drainage system, electricity, ventilation, sewage leh communication network bakah rail te a awm vek a ni.
A chhuat chu lei sawhngheh taka siam niin a bang chu reinforced concrete veka siam niin a luhna chu metal cylinder a bang 1.5 centimetre a chhah a ni bawk.
Israel sipaite chuan leiverh chhungah ralthuam thahnem tak an hmuh thu an sawi bawk.
Leiverh siam nan hian Hamas ten sum tam tak an seng tiin Lieutenant Colonel Richard Hect chuan a sawi a. “Leiverh te hian tum pakhat chauh a nei, chu chu Israel leh a khua leh tuite beihna tur a ni,” tiin a sawi bawk.
Leiverh chu Erex crossing bul lawk khera an siam nachhan pawh Israel chuan a bul hnai maiah Palestinian workers lut leh chhuak leh medical care-a zin tur te enfiahna a neihna hmun a nih vang a ti bawk a.
“Hamas-te hi chuan Gaza mipui te ngaihsak aiin Israel mipuite beih chu ngaih pawimawhah an nei zawk,” tiin a sawi bawk.
Islamist militant group Hamas te hian October 7 khan southern Israel run thutin mi 1,140 vel a tam ber civilian an tihlum a, mi 250 an man bawk a.
Hei hi chhang letin Israel chuan Hamas te chhut chimih vek tumin a bei zui ta a, vansang atang mai ni lovin lei lamah nen Gaza Strip chu a run zui ve ta a ni.
Hamas te enkawl Gaza Health Ministry chuan Israel chuan tun indona thleng mekah Palestinian 18,800 vel a tihlum tawh a ti a.
Gaza hnuaia leiverh te hi Israel sipaite chuan ‘Gaza Metro’ tiin an sawi a, Hamas tena Israeli-Egyptian blockade turu tak pumpelh nana an hman ber nia ngaih a ni.
Egypt nena inrinaah leiverh za tel siamin Sinai Desert thlengin a pawh a, heng leiverh hmang hian Gaza-ah bungrua leh ralthuamte a chawlut thin a ni.
Kum 2014-a Israel nena indona an neih hnuah Hamas te chuan leiverh te chu tam zawk siamin a tizau bawk a, rocket kahchhuah nan te pawh a hmang a ni.
October 17 khan Modern War Institute, US military academy West Point te chuan Gaza-ah leiverh 1,300 chuang awmin 500 kilimetres vel laia sei a ni, a ti.
December thla tir khan Israel sipaite chuan leiverh 800 chuang an hmuhchhuah tawh thu leh 500 an tihchhiat tawh thu an sawi bawk. Israel sipaite chuan kar kalta khan heng leiverhte hi Mediterranean atanga tui pump-a tuia chim tir an tum mai theih thu an lo sawi tawh bawk.