Pakistan-a sikul chimah zirlai 27 vel thi

Pakistan hmarthlang, Peshawar khawpuiah Ningani chawhmaa sikul kai laia a chung chimah zirlai, a tam zawk kum 13 hnuai lam 27 vel leh an zirtirtu a thi tih thuneituten an sawi a, thi hi an pung thei tih an sawi bawk.
Television-a thlalak an tihchhuahah chuan mi mel enkawl, Al-Khair Education Center pan hian ambulance an tlan nasa hle a, a chim kar atangin chhanchhuaktuten sikul naupang thi hnenghnuang an la chhuak laite a lang.
“Naupang 45 vel kan la chhuak tawh,” tiin district emergency officer Iftikhar ​Khan-a chuan tlai dar 3:00 velah a sawi a, naupang dang tang pawh an la awm tih a sawi.
Sorkar hotu, Bilal Faizi-a chuan rescue team-ten thite ruang lak chhuah tumin an bei a, hliam tuarte pawh damdawi inah lak nghal zel an ni tih a sawi.
Hliam tuar mi 20 leh thi zinga a tam zawk hi Lady Reading ⁠Hospital-ah lak an ni tih an thupuangtu, Mohammad Asim-a chuan a sawi.
Chhanchhuah hna thawktu hotu chuan a ching chhuat a chim hnuah ceiling-in naupangte hi a chim hnan a, in chhawng hniha sang hi a awp niin a sawi.
Peshawar police chief Mian Saeed-a chuan thi zat hi an pung thei niin a sawi a, classroom pathum, naupang 110 awm theihna atangin naupang 47 chauh an la la chhuak thei tih a sawi a ni.
“A in hi a derthawng tawh hle a, a chung hi a hnuai lam a chak tawh loh avangin a rit si a, a chim ta a nih a rinawm ber,” a ti a. A chim chhan tak erawh an la hre lo.