Colorado-ah Trump candidate remti lo

Colorado Supreme Court chuan Donald Trump-an nakum president thlanna neih turah an state-ah constitutional insurrection clause avangin a in candidate ve thei lo a ti.
Court chuan Trump chu an state ah candidate a ni thei lo tia sawiin a chhan chu US Capitol riot kum thum kaltaa thlengah khan a inhnamhnawih vang a ti a.
Trump campaign chuan court thutlukna siam chu anti-democratic tiin an khin let tur thu an sawi nghal thung.
Tun hi presidential candidate disqualify nana Section 3 of the US Constitution’s 14th Amendment hman hmasakna ber a ni bawk.
Hetiang deuh chiaha Trump in- candidate theih loh nana New Hampshire, Minnesota leh Michigan a lo kalpui tawh te erawh a hlawhtling lo thung.
Court thutlukna hi thla thar atanga hman tan chauh tur niin mahse Colorado state pawnah chuan hman theih a ni lo thung a.
Court thutlukna hi state chhung bika primary election 5 March a neih turah Republican voters tena president atana an duh an thlanna turah hman tur niin nakum November a Colorado a general election pawh nghawng thei tho a ni thung.
Court thutlukna siam chuan, “He thutlukna siam hi awlsam taka kan tih a ni lo. A nghawng len dan tur te leh zawhna awm thei te kan ngaihtuah vek a ni
“Chutih rual chiah chuan dan kenkawhnaa kan tihtur kan hria a, hlauh emaw duhsak bik nei hauh lovin kan thutlukna siamah mipui ngaihdan tur hisap hauh lovin thutlukna kan siam bawk,” an ti.
He thutlukna siam hian a hmaa Colorado judge in 14th Amendment insurrection ban chuan president a huam lo a chhan chu hming hmerhin a sawi lang lo a tih chu a hnawl zui bawk.
He court judge tho hian Trump chu US Capitol riot a inhnamhawih a lo titawh bawk a. Trump thlawptute chuan 6 January 2021 ah President Joe Biden an inthlana chakna certificate pek dawnin Congress luhchhuahin buaina an siam a lo ti tawh bawk.
Colorado Supreme Court thutlukna hi 4 January 2023 atanga hman tan theih chauh tur a ni a. He mi ni hi presidential primary ballots state a neih tura hun tiam ni hma chiah a ni bawk.
Steven Cheung, Trump campaign thupuangtu chuan court thutlukna siam chu ‘dik lo hulhual’ tiin a sawi a, justice tin te chu Democratic governors te ruat vek an ni a ti bawk a.
“Democratic Party leader te chu poll hrang hranga President Trump a hmasawnnain a tibuai a ni” tiin Cheung chuan a sawi a.
“Biden presidency-ah rinna an nghat tawh lo va, hei vang hian nakum November-a petchhuah an nih loh nan American voters te chu an theih dan ang zawng zawnga dan an tum a ni” a ti.
Cheung chuan Trump legal team te chuan US Supreme Court ah Colorado state thutlukna chu an khin tur thu a sawi nghal a. US Supreme Court ah hian conservative ten 6-3 in majority an la mek a ni.
Biden team te chuan Colorado ruling chungchangah engmah sawi an la nei duh lo va. Mahse, Democrat lam chuan court thutlukna chuan Democrats tena US Capitol riot thleng kha hel tumna a ni an tih a nemnghet an ti thung.
Republican lawmaker te pawhin Colorado court thutlukna chu demin House of Representatives Speaker Mike Johnson pawhin a sawisel a. “Political affiliation chu eng pawh ni se, khua leh tui tin tena kan president hlui an thlawp theihna leh Republican primary poll tina hmahruai mek an vote theihna dan tur a ni lo,” tiin a sawi.
Campaign-naah pawh Trump a Republican primary rival te pawhin court thutlukna chu duh lovin, Vivek Ramaswamy chuan Trump candidacy chu Colorado ah khap a nih chuan amah ngei a inhnuhdawh tur thu a sawi nghal bawk.
Trump chuan court thutlukna siamah engmah sawi a la nei lo chungin a fundraising email thawhchhuahah erawh ‘hei hi dictatorship pian dan chu a ni’ tiin a sawi thung.
Colorado Republican Party te pawhin court ruling chu kenkawh tlan a nih chuan state primary election atangin an inhnuhdawh tur thu an sawi nghal bawk a.
Mahse he case kalpuitu ber Citizens for Responsibility and Ethics in Washington (Crew) te chuan court thutlukna chu lawmawm ti thungin, “Chhinchhiahtlak leh dik a ni a, kan ramah nakin zel atan democracy kan humhim a ngai a ni” tiin group president Noah Bookbinder chuan a sawi.
14th Amendment hi American Civil War hnua siam a ni a. Section 3 chu US southern states tena Union an zawm leh hnua seccessionists te dan tumna atana siam a ni.
Confederate president Jefferson Davis leh a vice-president Alexander Stephens te lakah hman niin an pahnihin Congress member ve ve an ni a, chumi hnuah hman a ni zui ngai meuh lo.
Presidential election hnuhnung berah khan Colorado-ah Trump a chak lo chiang hle a. State hrang hrang court tena Colorado court thutlukna siam anga thutlukna an siam a nih chuan Trump-an White House luah leh a tumnaah harsatna nasa tak a tawh phah dawn a ni.
Thla kaltaa Colorado a case ngaihtuah a nihnaah Trump lawyer chuan US Capitol riot ah khan Trump chu a inhnamhnawih loh avangin mawhphurtu a tih theih loh, a ti a.
Mahse, Colorado Supreme Court thutlukna chuan Trump-an buaina thlen hma khan ‘amah thlawptute chu bei let tura tiin amah thlawptute chuan an chhang a ni’ a ti thung.