PNG-ah buaina nasa hle

Buaina nasa tak chhuak avangin Papua New Guinea capital Port Moresby-ah mi pariatin nunna an chan phah tawh a.
Dawr leh car te khar niin supermarket te rawk a ni nasa hle a, hei hi police tena an hlawh chungchang avanga nawrhna an huaihawt hnua thleng a ni a. Kawtthlerah mi za tam tak an pungkhawm a ni.
Prime Minister James Marape chuan dan kalha chetna te chu an ngaizam dawn lo tiin a sawi a. “Dan bawhchhiat chuan engmah hlawkna a thlen lo,” tiin a sawi zui bawk.
Dan leh hrai lekkawh turin sipaite chah luh an ni a, buaina nasa zawk chu thelh mih tawh niin boruak a la tang hle thung.
Local official te chuan police te nawrh remchanga laa inrawkna kalpui tute chu a dem thu a sawi a.
“Kan khawpuiah ngei tun ang thil thleng hi kan la tawng ngai lo, kan khwpui leh kan ram history a thil la thleng ngai lo a ni” tiin National Capital District Governor Powes Parkop chuan a sawi bawk a.
Nunna chan an awm phah hial thu sawiin pawi a tih thu a sawi bawk a. Port Moresby general Hospital chuan mi pariat nunna chan an chhinchhiah thu an sawi a ni.
Tharumthawhna chu capital pawnah pawh irhchhuak zelin Lae city ah pawh mi pasarihin nunna an chan phah bawk a. Eng tianga nasa in nge buainain a hneh dan erawh hriat chian theih a ni rih lo.
Tun buaina hi police leh public servant dang ten an hlawh chu 50% laia tihhniam a ni tih an hriat hnua parliament pawna lungawilohna an lantir atanga intan a ni a.
Prime Minister James Marape chuan public servant te hlawh atangin $100 vel lai computer fello avanga pek kim loha a awm thu a sawi a, sorkar chuan engmah lungawilo tena behchhana hmanga tax tisang anga an puhna chu an tih der loh thu a sawi bawk.
“Social media-in information dik lo hulhual thehdarhin a awm a ni” tiin Marape chuan a sawi a. Mipui thahnem tak te chuan dawrte chu an pawng rawk tawp mai a, building tam tak an hal bawk.
Ambulance official-te pawhin silai hmehpuahna a nasat thu sawiin US embassy pawhin an compound hnaihah silai hmehpuah a ni tiin a sawi bawk a.
Chinese embassy pawhin PNG sorkar ah lungawilohna thlenin Chinese businesses te chuan beih an tawk a, Chinese nationals hliam tuar an awm tiin an sawi bawk.
PNG thenawm Australia chuan remna leh muanna a awm theih nan ngenna a siam zui nghal a. Mahse, PNG chuan Australia sorkar atangin peacekeeping force a la dil rih lo thung.
PNG ah hian economic lamah tlakhniamna awmin inflation a sang a, unemployment rate a sang bawk a, prime minister chuan pressure a tawk nasa hle a. A hma lawk pawhin opposition te chuan prime minister lakah vote of no confidence an lokalpui tawh bawk a ni.