Aizawl khawpuia Assam Rifles ram luah chhunga mimal ram neite LSC cancel tura Gauhati High Court-a public interest litigation (PIL) thehluttu Central YMA chuan LSC hi cancel a, mipui tana ro tling siam turin a tawp thlenga beih an tum tih an sawi.
-- Advertisement --
Central YMA hruaitute hian Nilaini khan Land Revenue & Settlement minister Lalruatkima an kawm a. Assam Rifles ram luah chhunga dan kalha LSC pekte cancel tura 2019 kumtir lama Cabinet meeting-in hma lak a lo remti tawh chu lawmawm an tih thu sawiin, he ram hi mimal hnena pek leh sahthlak an remti loa, Mizo mipui tan thil tha leh rotling siamna’n a tawp thlenga beih an tum tih an sawi.
NGO Coordination Committee pawhin Assam Rifles ram luaha mimal ram neite chu surrender turin an lo ngen tawh thu te, helai hmuna LSC nei chu an LSC kawl reng loa sawrkara pe let tura an ngen tawh thute, an ngenna a hlawhtling lo nia an hriat vangin kum 2020 khan High Court-a PIL thehluh a nih thu leh reiloteah court hearing neih a nih an beisei thu minister hnenah hian an sawi a. Ram neituten an neih dan hi a felfai lo hle nia an hriat thu sawiin, mimal ram neite cancel sak tura sawrkarin hma a lak tawhnaah lawmawm an tih rualin, tun aia sawt zawka hmalak dan a awm theih beiseia minister hi hmu an ni tih an sawi a ni.
Revenue minister chuan hun rei tak atang tawhin chief secretary lo awm tawhte kaihhruainaa Revenue leh Home department hma lo lak tawh dan leh bawhzui dan a lo hrilhfiah a, mimal leh pawl anga duhdan leh ngaihdan dah boa, ram leh hnam tan a ni tih hria a, ram leh hnam tana tha ber tur thlira helai hmuna ram neitute leh CYMA bakah sawrkar pawhin rilru zau put a pawimawh tih a sawi.
“Mi zawng zawng kan tan tlan a pawimawh a, sawrkar pawhin hmathlir thui tak neiin helai hmun hi thangthar leh Zoram tana rotling ni tura tuaihnum a duh a ni,” Lalruatkima hian a ti a. Hemi hre chung hian Land Revenue & Settlement department chuan session kal mekah ‘The Mizoram (Restriction on use of Transferred lands) (Amendment) Bill 2023’ chu House-a ngaihtuah turin a pulut tih a sawi.