Chief minister Zoramthanga thu anga Mara Autonomous District Council sawrkar paihthlak ni ta anga sawi chu thu belhchian dawl lo a ni tih MNF vice president Lalthlengliana chuan a sawi a. CM thu hmu loa paihthlak a ni zawk tih a sawi.
-- Advertisement --
Siaha District Hqrs. buatsaihin Thawhlehni khan Siaha Bazarah vantlang inkhawm neih a ni a. He hun hmanpuitu MNF vice president chuan tun MNF ministry-a minister chawlhtir a ngai chu an duhthusam a ni loa, vanduaithlak an ti a, sawifiah a ngai tih a sawi.
MNF sawrkarah Siaha bialtu MLA Dr K Beichhua chu portfolio tha tak pein Siaha district development atan a kutah thuneihna sang tak dah a ni tih sawiin, “12th MADC-ah hian MNF MDC 9 leh INC MDC 4 ten sawrkar siama an thawhho mek laiin, 2022 November 25 khan MNF MDC 5-te hriat lohin minister Dr K Beichhua hoin MNF MDC 4 dangte nen, party duhdan niloin MADC sawrkar an phar tla a. Chief minister thu anga MADC sawrkar paihthla niawma an sawi hi thu belhchian dawl lo a ni,” a ti.
Ram khat chief minister meuhin MDC 9-te chu MDC 5 leh 4 a thendarh a, sawrkarna tichhe tura intih chu tumahin an awih loanga, a ti bawk hek loang tih Lalthlengliana hian sawiin, “Party thuneitu sang – National Core Committee leh Political Affairs Committee ten thutawp siam tur an nih laiin, ‘CM-in go ahead’ a ti, tia MNF MDC 9-te tihphel hi party pawisawina lian tak a ni. Thenkhat thlauhthla zawnga kal hi thil tih chi a ni ngai loa, rem pawh kan ti lo,” tiin disciplinary action lak a nih chhan a sawi.
Hotu senior-ten ngun taka an ngaihtuah hnu ah Dr K Beichhua chu minister atanga chawlhtir tul an tih tak thu MNF hruaitu hian a sawi a. Hetiang hi MNF-ah a thleng khat a. Hrem awm chi ngawih ngawih pawh hrem lohin an awm fo thin zawk niin a sawi.
“Politics-ah chuan mi pakhata tlukluh thuk lutuk a tha ngai loa, a huhoa kalpui chi a ni. MNF atanga banna thehlutte hi lo kir leh se kan ti. He bialah hetiang boruak hi a thleng fo tawh a, party-ah an lo kir leh thin. Dr Beichhua pawh hi lo kir leh se kan ti hle,” a ti.
MNF party chuan harsatna a tawh fo thin thu leh, a thawh leh tawh loh tur thu te sawi thin ni mah se, ral a hnehin sawrkarna an siam mek a, kum 2023 inthlanah pawh sawrkarna an siam leh ngei an beisei tih MNF vice president hian a sawi bawk.