Mizoram Legislative Assembly deputy speaker thar atan Lawngtlai East bialtu MLA H Biakzaua chu chuhtu awm loin a tling.
-- Advertisement --
Deputy speaker hmunruak hnawhkhah ngai hi Nilainia Assembly Session neihah a thlana thlan tur a ni a, MNF Legislature Party candidate H Biakzaua hian chuhpuitu a neih loh avangin inthlan ngai loin tlinga puan a ni tih speaker Lalrinliana Sailo chuan House a hrilh. A thutna hmun turah hian speaker Lalrinliana Sailo, House leader Zoramthanga, Congress Legislature Party leader Zodintluanga Ralte, ZPM Legislature Party leader Lalduhoma ten a thutna hmasa, Treasury bench atangin an hruai a ni.
Nilaini vek khan H Biakzaua hian Mizoram Legislative Assembly-a a pisa thar a luah a. He hun hi chief minister Zoramthanga, speaker Lalrinliana Sailo, deputy chief minister Tawnluia, minister leh MLA rualten an hmanpui.
Chief minister chuan deputy speaker thar chu politics-a tawnhriat ngah tak a ni, tiin, “He hna hi a tlin kan ring a, a lawmawm kan ti a, thinlung tak takin kan lawmpui a ni” a ti. Speaker pawhin deputy speaker thar a lawmpui tih sawiin, “A thlamuanthlak ka ti a, duhsakna ka hlan a ni” a ti.
Mizoram State Legislative Assembly deputy speaker 17-na tura thlantlin H Biakzaua chuan he dinhmun luah thei tura thlantlin a nih chungchangah lawmthu a sawi a ni.
Mizoram Union Territory a nih lai atanga chhiarin H Biakzaua hi deputy speaker 17-na a ni a, state nih hnu atanga chhiarin deputy speaker 12-na a ni thung.