POLITICIAN: “Mi dik vs Mi fel”

Zobiakvela (Masena)

Kum 2014-a PM Modi-a sorkar lâkluh a nih hnu lawk khan India rama sorkar hnathawk lian ber pakhat, Foreign Secretary, Pi Sujatha Singh-i chu sorkarin a bân thut mai a, a aiah Dr. Jai Shankar-a a dah nghal a.
Pi Sujatha-i tan chuan a tlâwmthlakin a hreawm ve ngawt ang. Chumi hnua NDTV-in a kawmnaa hmêl hlim taka a thusawi te kha a ropui a, India mipuite tan hriat reng tlak a hnutchhiah a, a then lai chauh lo ngaithla lawk teh ang.
“IFS officer hna, kum 38 chuang ka thawh chhûngin ka tih theih sâng ber ka ti. Sorkar thar a lo piang a, Foreign Secretary thar an duh a nih chuan sawi theih ka nei lo.
Min bân nî khán kan Minister, Pi Sushma Swaraj-i’n dar 2:00pm-ah min rawn bia a, ‘PM-in Jai Shankar hi Foreign Secretary atan a duh a,’ a rawn ti a, ka chiang nghal mai. Ka pasal ka hrilh a, mi dang kâ atanga an hriat loh nan ka nu leh pa ka hrilh nghal bawk a.
Min thlâktu tán file pending hnutchhiah ka duh loh avangin ka chawlh hmain ka dawhkana file ka ching fel vek. Thla 18 chhûng, Foreign Secretary ka ni a, India ram tan ka tih theih sâng ber ka ti. Ni nawn leh mah ila a aia thaa tih dan ka hre chuang lo. Chu chu ka thawhpuiten min hriatpui.
Ka vui lo. Sorkarin a duh chu a ti tur a ni. Tumah ka tlawn ngai lo a, ka haw hek lo. Ka tih tawhah khan ka lungawi a, keimâ chungah hian ka lawm a ni. IFS tana hna lian ber ka chelh theih chhan pawh hi ka senior vang mai a ni lo, min dah loh theih lohna khawpa record tha ka neih vang a ni ve bawk,” a ti.
Mi fate hi an ropui thin mange. Thil tul lo, amah la vuak lêt theihna tur reng reng engmah Pi Sujatha-i hian a sawi duh hauh lo leh a hnutchhiat hauh lo hi a ropuina leh a finna lai chu a ni.
Kan hnathawh tui lai tak leh chelh mêk, kan vawn laite kalsan a tul châng a awm thin. Kan la ui ngawih ngawih a nih chuan, inenfiahna tur kan nei tihna a ni thei ang.
Politician, Mi fel tak tak kan kawl tawh thin a, mi fel, dik si lote hian thil tam tak an thâm hnawk thin. An tih tawh lama zei-hawi lutuk, fel mah mahte hian thawhhona an ti chhe duh châwk a! Chutih rual vek chuan anmahni ngei pawh chu, fel hlê mah se, an fel a, an fel leh lutuk a, an fel ral der mai a ni. Hetiang mite hi ram leh hnam hmelma an ni a, a tha zângin mipui hriatzui leh sawizui an hlawh ngai tawh lo.
Politician, ‘Mi dik’ nihna chuan rinawmna a keng tel a. A hun laiin fak leh chawimawina kotlângah hûn-chhuah ni lo mah se, a dikna leh rinawmna chu hriat reng a ni tawh thin.
Pi Sujatha-i’n “Ram tân ka tih theih sâng ber ka ti. Ni nawn leh mah ila a aia thaa tih dan ka hre chuang lo. Chu chu ka thawhpuite’n min hriatpui,” a tih tluk hian Mizo Politician-te hian sûlhnu tha kan hnutchhiah ve ang em le?
A nih loh leh, “Hna lian ber ka chelh theih chhan pawh hi ka senior vang mai a ni lo, min dah loh theih lohna khawpa record tha ka neih vang a ni ve bawk,” tia a sawi ang te hi, kan sawi ngam ve angem le?
Dik tak chuan, hnam dang (vai) ho-in an tlin em em, Rel chêtsual avanga Railway Minister-in banna a thehluh maina ang chi, ‘moral responsibility’ te hi kan ramah hian kan sawi phâk ve meuh lo chu a ni ber a!
Mipui rawngbawl duh anga lang chung hian, party-a nihna leh, sorkar-a thuneihna chelh hi chu, kan term a tâwp hma hi chuan eng ang pawhin hmingchhia-in hlawhchham mah ila, uai tân ngar ngar hi kan tum a ni ber mai a! Kan tum ber chu, ‘tlin leh a, duhtâwka chawm bawk a, hâwp bawk’ hi a ni leh thin.
Mahni inhriat chian hi a har hle mai. Mipui thinlunga tlâk leh hniam hi a pawi lai ber a ni a. Minister hlui leh MLA engemawzat an tla a, tunah châwl rih mah se, mipui thinlungah anmahni an tlâk hniam loh phawt chuan, a aia nasa-a vawrh chhuah hun an awm leh ngei ngei ang. Tuna thuneihna chelhtute ngei pawh, mipuiah an hniam chuan; dam chhûnga ding chhuak tawh lo tur pawh an awm ang.
“Ka hna chelh ngai ang kha, chelh nawn leh mah ila a aia thaa tih dan ka hre chuang lo,” ti thei khawpa Pi Sujatha-i’n a sawi ang khian; sûlhnu pawr nei lote chu mipui lam zâwk hian an ko chhuak leh em em ang. Chuvangin, ‘mi fel’ ringawt ni lo, ‘mi dik’ hi Mizo mipuite hian kan zawng a, kan duh fír tulh tulh dâwn ni pawhin a lang.