2023 chhungin TB vei mi 2262 hmuhchhuak

Kum 2023 chhung khan Mizoramah TB (Tuberculosis) vei mi 2262 hmuhchhuah an ni a, TB vangin mi 108 an thi.
Kum kalta chhunga National TB Programme (NTP) hnathawh thlirletnaa tarlan danin, nikum chhung khan TB rinhlelh mi 17432 exam an ni a, TB vei mi 2262 hmuhchhuah a ni. TB damdawi ei nel nual tawh, a damdawi pangngaiin a tih dam zawh tawh loh, Multi Drug Resistant TB (MDR-TB) vei mi 164 hmuhchhuah an ni bawk.
TB vanga thi 108 an awm a, Aizawl district-ah TB vanga thi tam berin mi 70 an ni. TB vei hmuhchhuah zingah zaa 5 chu zunthlum an ni tih hriat a ni a, zaa 32 chu vaihlo kaihhnawih ti an ni. TB tihdam zat chu a vei hmuhchhuah atangin zaa 86 a ni.
Aizawl district chu hmuhchhuah tamna ber niin mi 1600 an ni a, Mamit district (27) chu hmuhchhuah tlemna ber a ni. District thar pathum chu a hrana chhiar an la ni lo.
Thutkhawmah hian he natna awm tawh loh khua, ‘TB Free Village’ ni thei tura hmalak meknaah mi 1000 ah mi 30 zel endik an ngaih avangin district leh Health and Wellness Centre thlengin enfiah zat tura bituk sa an endik tlin theih nan hma la theuh tura tih a ni. TB Free Village ni theite hi kumtin World TB Day ah chawimawina hlan thin an ni dawn a ni.
TB vei zawn chhuah hna, active case finding chu district hrang hrangah nasa lehzuala kalpui tura tih a ni a. Hetah hian TB kai theihna nei sang leh vei awlsamna hmun chu tinzawn uar bik an ni. Heng zingah hian HIV hrik pai, zunthlum nei, vaihlo kaihhnawih ti, zu in mi leh nau pai, chaw tha hmu tlem, refugee camp, jail, home leh hmun kilkhawr leh tlawhpawh harsatna hmuna chengte zingah nasa lehzuala endik tura tih a ni.
Hnathawh thlirleta thutkhawm hi National Health Mission mission director Dr Eric Zomawia chuan a hmanpui a ni.

District hrang hranga TB vei hmuhchhuah dan:

Sl. District Hmuh
No zat
1. Aizawl 1600
2. Lunglei 142
3. Kolasib 140
4. Siaha 120
5. Champhai 102
6. Lawngtlai 88
7. Serchhip 53
8. Mamit 27