Zo hnahthlakte’n Pastor pathumte sun

May ni 13-ah Manipur-ah Zo hnahthlak Pastor pathumin ralthuama beih an tawh avangin nunna an chan a, Manipur-a Zo hnahthlakte’n nunna chante hi an sun hle.
Churachandpur khawpuiah chuan May ni 13 atang khan pawn chhuah loh tur an ti nghal a, a tukah pawh khawlai a reh. Kangpokpi lamah pawh ni thum chhung sun tur an ti.
May ni 13-ah hian Thadou Baptist Association India (TBAI) hruaitute, Churachandpur atanga Kangpokpi-a an haw lam chu kawng lakah mi tu tih hriat lohte’n an lo lambun a, a hmunah Pastor pathumin nunna an chan. Mi dang paliin hliam an tuar bawk.
TBAI hruaitute hi Manipur Baptist Convention hmanga Churachandpur-a kal an ni a, an haw lam, an thleng hnai tihah Kotzim leh Kotlen khaw inkarah ralthuam lek pawlin an lo bei a ni.
He vanduaina hi a rapthlak a, a tuartute hi kohhran mi, rawngbawla zin an nih avangin mihring rilru a deng zual nia ngaih a ni. Manipur-a Zo hnahthlakte chauh ni lovin Mizoram mipuite pawhin an tuarpui a ni.
Lo lambun-tute hi hriat a la ni lo a, ralthuam lek pawl hrang hrang an inpuh kual. Sakhaw rawngbawltute laka pawikhawihna a nih avangin a titute tan pawhin inthup an tum nia ngaih a ni.
Nunna chan zinga pakhat Rev Dr Vumthang Sitlhou phei chu remna a awm theih nana tha thawh thin a ni a, tun hnaiah pawh Kuki leh Naga inkarah a theih ang angin a palai a ni. A pa pawh Rongmei-te hnena chanchin tha hriltu hmasa a ni a, Rongmei tawnga Bible lettu a ni.
Churachandpur khawpuiah chuan zirna in leh sorkar office-te an inkhar a, khawlai pawh a reh ruih tih thu dawn a ni. Gangte Baptist biak inah nunna chante sunna hun an hmang bawk. Kangpokpi lamah pawh nunna chante sunna hun hi ni thum chhung hman tur an ti a, mipuiin nunna chante hi an sun tak zet tih thu dawn a ni.