Online hmanga House book-na siam

General Administration Department enkawl Mizoram sawrkar quarters luah dilna leh pekna online hmanga kalpuina Quarters Allotment Management System (QAMS) leh state pawna Mizoram House online hmanga book-na Mizoram House Online Reservation System chu Ningani khan chief minister Lalduhoma’n a hawng.
Chief minister chuan, sawrkar quarters luah dilna hi lehkha thehluh hmanga kalpuiin, computer pakhatah dahthat a ni a. Quarters ruak, pension leh thihna avanga singsak ngai pawh manual veka kalpui a ni a. A enkawltu department tan leh a diltute tan a buaithlakin hun a heh thin tih a sawi. Online hmanga kalpui a nih chuan quarters luah dilna a hmuna lak a, thehluh kher ngai loin, awlsam takin internet kaltlangin a tih theih dawn a. A enkawltu lam tan a lo awlsam phah dawn tih a sawi a ni.
Chutiangin Mizoram House pawh office-a kal a, dil kher ngai loin online hmangin a dil theih dawn a. Aizawl pawna chengte tan phei chuan a hahdam thlak zual dawn tih a sawi a ni.
Tunlai thiamna hmanga mipui tana awlsamna siam chu sawrkarin a ngaipawimawh a. Uar deuh deuh a, Mizoram chu digital state-a siam hial an duh tih a sawi bawk.
QAMS hi 2025 August atanga buaipui tan a ni a. ICT department siam niin, site address chu – qams.mizoram.gov.in a ni. House Online Reservation System hi Mizoram State e-Governance Society siam a ni a. Kumin March 2 atang khan enchhin tan niin, official-a hawn a nih hma hauhin dilna 2796 a lut hman a, mi 1640 chu allotment pek an ni. A address chu: mizoramhouse.mizoram.gov.in a ni.