Party lian pathumte inthlang dawn

Mizorama political party lian pathumte’n hruaitu thar thlan an hmabak mek a, politics chanchin ngaihvente tan titi ngaihnawm tak tak a awm turah ngaih a ni.
Inthlan hun tichiang hmasa bertu Congress party chu February ni 20-ah an inthlang dawn a, February ni 5-8 chhungin din tumte tan hming a pekluh theih.
Congress party hian official candidate an nei dawn a, president atan Lal Thanzara, vice president atan Lalnunmawia Chuaungo, treasurer atan Dr Lalmalsawma Nghaka te an ni. Official candidate-te hian khingtu an nei ngei dawn niin a lang a, president atana Zodintluanga Ralte, vice president atan C Ngunlianchunga, treasurer atan Lalrindika Ralte te an ding dawn nia ngaih a ni.
An party president Lalsawta’n din a tum lo a, ani hian party chawlhsan lovin inthlan politics (electoral politics) chawlhsan a tum thu a lo sawi tawh.
MNF party-in inthlan an hmabak mek; tuna an hruaitute hun hi nikum khan a tawp a, inthlan kum a nih avangin hruaitu ding laite hian inthlan thleng party hi hruai se an tih avangin hruaitu ni mekte hian an hruai tlang a ni.
Inthlan hun tur an la tifel lo a, a ding tur pawh hriat a la ni lo. An president-in senior vice president nen chawlh an tum thu a lo sawi tawh a, mahse hei hi party-in an pawm dawn em tih hriat a ni rih lo.
Sorkarna changtu ZPM chu February ni 15 leh ni 16-ah an inthlang dawn a, hemi atan hian January ni 31 khan circular an chhuah.
ZPM hian official candidate an nei dawn lo a, floor atanga nomination siama inthlan an tum. Elected office bearer tur bakah executive member tur mi 100 an thlang bawk ang. Executive member nih tumte tan February ni 1 atanga ni 12 thlengin hming a pekluh theih an ti.