Kan ram mau hman tangkai phawt hi kan tih hmasak tur – Horticulture minister

Kan rama mau kan neihsa hman tangkai a, sawngbawl dan ngaihtuah phawt chu kan tih hmasak tur a ni tih Horticulture minister Prof. Lalnilawma chuan a sawi.
Ningania Mizoram Horticulture Service Association general conference a hmanpuinaah minister chuan hei hi a sawi a. Kan suangtuahnate a taka kan bawhzui zel chuan kan ramin hma a sawn ngei a beisei tih a sawi. Ei leh bara intodelhna kawngah an department chu a pawimawh ber zing ami an nih angin, kalphung thar sawrkarah a ngai pet peta kal loin, thil danglam thlentirtu nih tum turin a chah.
Thleibik nei loa mi taima leh a thawk thate beneficiary an thlan thin tur thu sawiin, “Sawrkar policy tihlawhtling turin export oriented leh result oriented lamah ngaihtuahna hmang ang u,” a ti.
An department enkawl kuthnathawktute chu thingtlangmi, thil hre zau lo zawk leh inthlahrung tak tak an nih angin, officer leh thawktute chu hawihhawm taka lo dawngsawng thin turin Prof Lalnilawma hian a chah bawk.
MHSA general secretary Lalremruata sawi danin, Mizoram zau zawng sq. km. 21,081 atangin ‘potential horticulture area’ hi hectare nuai 11.56 (55%) a ni a, tuna horticulture area neih mek chu hectare 1.5 (13%) chauh a ni.