GIG Motors-in Transport Dept.-ah car an donate

Mizorama car hralh chhuaktu lian ber, Maruti Suzuki dealership GIG Motors chuan nimin khan Mizoram sorkar hnuaia Transport Department-in a tul tul an hman atan Ciaz car an hlan a, car hi Transport Department Director leh officer dang ten GIG Motors Arena showroom, Edenthar-ah an dawng a ni.
GIG Motors CEO John Lalpeka chuan khualehtui tha an nih ve theihna kawng khat nia hriain car hi an hlan niin a sawi a, sorkar-in sum leh pai lamah harsatna an tawh chang a awm a, sorkar tan lirthei lei belh a harsa a, chutiang karah chuan department lam mamawhna te tlem azawng tal a lo phuhruk ve theih beiseina nen Ciaz car hi sorkar-ah an donate ta niin a sawi.
Sorkar a car donate hi nikum lam atanga an lo tum tawh a ni a, mahse, sorkar lamin chuti maiin an lo dawng nghal mai thei lo va, sorkar lamah thil tul leh pawimawh te an buaipui leh fe hnuah car donate phalna hi tunhnaiah a chhuak thei ta hram a, nimin khan an inhlan fel ta nghal a ni.
Transport Director Er. R. Lalrammawia chuan GIG-in car an pe chu sorkar aiawhin lawmthu a sawi a, GIG chu motor hralh ringawt ngaihtuah lo va, customer care pe tha hlea a hriat thu sawiin, chutihrual chuan lirthei zuar ten an tum ber chu hlawkna ni mah se an hlawkna chu Mizo mipuite pawhin kan lo chhawr tangkai ve tur a ni tiin, CSR chu hnamdang te pek tur chauh a nih loh thu a sawi a, GIG chu CSR lamah pawh che tha viaua a hriat thu a sawi bawk a ni.