National Health Mission thawktute chuan centrally sponsored scheme hnuaia awmte hamthatna tur cabinet meeting-in kum a ral hnu ah pawh an chungchang a la ngaihtuah lo nia lang chu hriatthiam har an tih thu an sawi.
NHM Employees Union Mizoram (NEUM) thuchhuak chuan 2021August 16-ah CSS hnuaia thawktute hamthatna tur zirchianga sawrkarin a din Study Team-in a zirchianna leh rawtna, sawrkar huntiam a ral fe hnu ah leh NEUM hruaituten chief minister an hmuh tawh hnu ah pawh tun thlengin cabinet meeting-ah ngaihtuah tura chhawpchhuah pawh a la ni lo tih a sawi.
-- Advertisement --
‘Mipui hriselna kawnga thawktute kan nih avangin kan ngaihpawimawh ber chu mipui hriselna a ni reng fo a. Amaherawhchu, kan harsatna kan thlen thinte, kan hamthatna tura hma min laksakna kawnga sawrkar hmalakna chik zawkin kan umzuiin kan thlithlai reng dawn a ni,’ tiin, member-te pawh a tul dan anga lo inruahman turin an inhriattir tih a sawi.
Tunhnaia FMGE&W-in a hun taka hlawh an lak theih loh avanga sawrkar laka an lungawiloh thu an sawi chu awm an tih puiin an hriatthiam pui takzet tih NEUM hian sawiin, hnathawktute, thawk nghet emaw nghet lo emaw CSS hnuai ami pawh ni se, a hun taka an thawh hlawh pe thei tura inbuatsaih tur leh ruahmanna siam turin sawrkar thuneitute an ngen thar tih a sawi bawk.