Christian Hospital Serkawn (CHS) chuan an kum za tlin, Centenary chu Zirtawpni khan BCM Hqrs office Serkawnah an lawm a. Health & Family Welfare minister Dr R Lalthangliana’n a hmanpui.
-- Advertisement --
Christian Hospital Serkawn din tan kum, 1923 atanga tun thlenga Zoram mipui tana an hnathawh leh rawngbawlna chu ropui leh fakawm a tih thu Health minister hian a sawi a. Tihdam rawngbawl kawnga CHS thawktute thawhrimna leh inpekna fakawm tiin, Covid-19 doletna kawnga an hnathawhte, Baptist Covid Care Centre hawnga Covid positive-te an enkawlna avangin lawmthu a sawi a ni.
Ram hmasawn zelna turin mipui damna leh hriselna a pawimawh hmasa ber a. Kan health infrastructure-te tichangtlung zel turin sawrkar chuan chak takin hma a la zel a ni,” Dr R Lalthangliana hian a ti a. JICA nen tangdunin Cancer Superspeciality Hospital din tum a nih bakah hospital awmsa tih changtlun, khawl ruahman belh leh Sub Centre, PHC tihchangtlun kawngah hma lak zel a ni tih a sawi.
Mizorama hospital leh medical college-a thawktu tur Mizo mithiam kan indaihloh fo thin tih sawiin, zirlaite leh thangtharte chu tan la a, heng mamawhna te chhang theia ke pen chhuak turin a sawm a ni.
Baptist Church of Mizoram Medical & Health Department director Dr Lalramzauva sawi danin, Christian Hospital Serkawn hi Mizorama Mission Hospital hmasa ber niin, sawrkar hospital chhiar telin Mizorama hospital 3-na a ni. A hawngtu hi Mizoram bawrhsap Mrs WL Scott nupui a ni. Kum 1919-ah nursing zirna bul tan tawh niin, kum1921-ah pharmacy neih a ni a, kum 1921-ah damdawi in hi sak tan a ni a, 1923 February 10-ah luahluh a ni. He hospital-ah hian inzaina, operation theater kum 1931-ah neih a ni. CHS awmchilh doctor hmasa ber Dr HG Stockley chuan kum 1957 ah zawmin CHS-a Mizo doctor thawk hmasa ber chu Dr C Silvera (1964) a ni.
CHS Centenary lawmna pual hian BCM general secretary Rev R Lalbiakliana’n Hospital Centenary building thar a hawng a ni.
Centenary building hi January 2021 ah sa tanin lungphum phum a ni a. BCM Property Department-in departmental work-in a sa. A building hi L-shape, Zopa chhiara chhawng 4 a sak tur a ni a, basement floor hi parking adt. atan, ground floor-ah Radiology block (Lithotripsy, Ultrasound, Xray, CT Scan etc), first floor-ah Blood Bank, Donation Room, Counselling Room leh a dangte ruahman a ni.