Armed Group ten Tripoli chhuahsan ang

Armed group te Libya capital Tripoli kum sawm chuang awp tawh tute chuan khawpui chhuah san an rem ti ta.
Interior minister Imad Trabelsi chuan hun rei tak inbiakna neih a nih hnuah inremna siam thei ta in tunah chuan Libya regular force ten Tripoli an enkawl tawh ang a ti a.
Libya hi kum 2011 a Muammar Gaddafi paihthlak anih hnu atang khan armed group te inbeihna nasa tak a thleng zui a. Gaddafi thih hnuah thuneih inchuhna chuan haratna namen lo siamin buaina in a khat zui a ni.
Libya hi hmun hniha inthen mekin pakhat chu khawvel ram dang te pawmpui khawthlang lam sorkar a ni a, interim Prime Minister Abdul Hamid Dbeibah kaihhruai a ni a, pakhat chu military strongman Khalifa Haftar kaihhruai khawchhak lama sorkar a ni.
Trabelsi chuan tunah chuan militia te chu an headquarter ah awn awm tawh ang a ti a, Libyan sorkar chuan mission bikah emaw thil pawimawh bikah chauh a hmang ang tiin a sawi a.
Tripoli an chhuahsan hnu chuan capital dangah pawh kalpui zel a ni ang a, kawngpuiah checkpoint leh armed group te an awm tawh lo ang tiin a sawi bawk.
Inremna hmangin armed group panga lai chuan Muslim holy month Ramadan tawp 9 April ah Tripol an chhuahsan hman dawn a ni.
Militia te hi – General Security Force, Special Deterrence Force, Brigade 444, Brigade 111 leh Stability Support Authority te niin ralthuam nei tha tak ni vekin Tripoli khawpui chu chan an insem a ni.
An ram hauh bik chinah zel checkpoint te siamin anmahni pawh an inbei fo a, nikum August thla pawh khan militia te inbeihnaah mi 55 in nunna an chan a ni.
Libyan sorkar thununna hnuaia awm an ni lo va, mahse sorkar in sum a pek an ni thung. An duh anga an chet lak theihna hi Libya sorkar in kum 2021 a special status a pek thlap te an ni bawk.