Zelensky-an hnehna chang dawn ti
Ukraine president chuan Russia-in Ukraine a run kum hnihna chamah indona kalpui mekah Ukraine in hnehna a chang dawn tiin a sawi a.
“Tu te mahin kan Ukraine hi a tawp kan remti dawn lo” tiin Volodymyr Zelensky chuan a capital Kyiv ah a sawi a. Khawthlang ram te chuan Ukraine an thlawpna chu an sawh nghet zual zel bawk.
Tun hnaiah erawh indona tualzawlah Ukraine chuan hnungtawlhna hrang hrang a tawng thung.
Zelensky chuan mi pangngai tupawhin indona ch tawp se an duh vek ang a, mahse, indona tawp chu Ukraine duh danin tawp se an duh vek ang tiin a sawi a.
“Hei vang hian a nia ‘indo tawpna’ chu ‘kan duh dan angin’ a ni tur a ni. Chuvang a nia ‘inremna’ chu ‘dik leh fel’ a nihna chhan a ni reng a ni” tiin a sawi a.
“Kan theihtawp chhuahin kan bei a. Ni 730 chuang kan bei tawh a, chakna kan chang ngei ang” tiin a sawi bawk.
Kyiv a Zelensky an thusawina a neihah hian Italy, Belgium leh Canada leader te mai bakah President of European Commission, Ursula von der Leyen te pawhin an telpui a ni.
Indonaa nunna chan te zahna lantir nan pangpar an dah a. Mahse, h ehunah hian US aiawh te an awm lo thung a, nikum kha chuan President Joe Biden an a telpui thung.
Mahse kar kalta khan Zelensky chuan US Democratic senator rual Majority leader Chuck Schumer kaihhruai te chu hmu thungin Washington chuan Ukraine a thlawpna chu sawhngheh zel nia ngaih a ni thung.
Von der Leyen pawhinUkrainian sipai te chu Russia runna laka an chet danah fakin tun thlenga Russian sipaite an la dan theih zel avangin a fak a. “Russian beihna in la dang thei zel a, in ram mai bakah Europe in humhim a ni” tiin a sawi.
Italy leh Canada te pawhin Kyiv nen security pack an ziah thu sawiin chu chu Ukraine in Nato military alliance a zawm theih nana pawimawh tak anga ngaih a ni. Canada, Italy, UK leh US te chuan virtual meeting enihnaah Russia hrekna thar kalpui tur an puang zui bawk.
Europe hmun hrang hrangah Ukraine thlawpna lantirna neih niin chunga tel te chuan Russian President Vladimir Putin chu indona titawp turin an ngen bawk a. Moscow khawpuiah pawh Russian sipai nupui ten indona duhlohna lungawilohna an lantir bawk.
Tun hnaiah Ukraine in indonaah hnungtawlhna tawngin khawpui pawimawh tak Avdiika chu a rauhsan a, Russia-in thla tam tak hnua hnehna a chan pawimawh bera ngaih a ni a. Ukraine counter-offensive chu US in tanpuina a pek belh theih mai loh avanga zuai nia ngaih a ni.
Indona erawh kalpui zui zel niin Russia in Ukrainian khawpui a beihnaah mi paliin nunna an chan a. Kyiv pawhin Russia steel plant lian ber chu drone hmangin a bei bawk a. Russian warship a tipil bawk.