Haiti-ah gang ten lung in tangte chhuah

Haiti capital Port-au-Prince a lung in lian ber chu silai keng gang ten luhchhuahin lung in tang an chhuah zalen.
He lung ina tang tam zawk mi 4,000 chuang te chu an tlanchhuak niin local journalist te chuan an sawi a.
Lung in tang tlanchhuak zingah hian kum 2021 a President Jovonel Moise thahnaa inhnamhnawih gang member te pawh an tel a ni.
Americas a ram rethei ber Haiti a tharumthawhna in tun hnaiah zual lam a pan zel a, PM Ariel Henry paihthlak tum gangs te chuan Port-au-Prince 80% vel an thunun tawh nia sawi a ni.
Tuna buaina chhuak hi kar kalta Ningani a prime minister-in Nairobi pana Kenyan kaihhruai multinational security force tam zawk Haiti a dah an nih theih nana inbiakna neia a kal hnua thleng a ni a.
Gang leader Jimmy Cherizier (a hming lem Barbecue) chuan prime minister chu paihthlak an tum thu a puang zui a.
“Kan vaiin provincial town a armed groups te leh capital a armed groups te chu kan inlungrual a ni” tiin police officer hlui Jimmy Cherizier chuan a sawi a. Port-au-Prince tharumthawhna tam zawka inhnamhnawih nia ngaih a ni bawk.
Lung in beihnaah hian police officer pali in nunna chanin mi panga in hliam an tuar bawk a. Haiti-a French embassy chuan khua leh tui te Haiti capital chhehvela zin rih lo turin ngenna a siam zui bawk.
Haiti-ah hian President Moise thah a nih hnuah tharum thawhna a hluar zual a. President tun thlengin neih a la ni lo va, kum 2016 atang khan inthlanna an la nei leh lo bawk.
Politics a inremna siamah inthlanna neih tur niin chumi hma chuan Henry chu prime minister ni rihin 7 February kha a hun tawp hun a nih laiin a bang chuang lo va, inthlanna neih a ni bawk lo a ni.
January thla khan UN chuan nikum khan gang violence avangin Haiti ah nunna chan 8,400 an awm tiin a sawi a, kum 2022 aiin a let hnihin gang kaihhnawih avanga nunna chan an pung a ni.
Haiti ram pumah buaina nasa zual zel tur ven nan darkar 72 chhung state of emergency puan zui nghal a ni a. Hetihlai hian gang rual te chuan engti kawng pawhin prime minister Ariel Henry chu paihthlak an tum thu sawiin lung in an beihna chhan pawh bang tura an nawrna an ti ve thung.