Rel lo lut tur hi…

Nimina NGO Coordination Committee thukhawm chuan, Bairabi – Sairang inkara Rel kawng siam mek chungchang leh siam zawh hunah a nghawng tur hrang hrangte an sawiho a, Mizo hnam tana a him leh him loh dan turte thlirho a ni a. Hun remchangah hemi chungchang zirhona hi buatsaih ni se an ti a.
Mizoram chhung laili lama rel lo lut tur hian tunhma atang tawhin sawi a hlawhin mipuiin kan lo helh lawk em em thin a nih kha. Look East Policy a lo piang a, chu chuan Act East Policy a hring zui a, chumi hnuaiah chuan Kaladan Multi-Modal Transit Transport Project kalpui a ni a. Hei hian tunhmaa khawmuala bungraw phurhna thui tak thin kha, Bay of Bengal leh Myanmar lawngchawlhna paltlangin Mizoram chhim lamah rawn lutin bungraw phurhna kawng a titawi sawt dawn a, bungraw man pawh tlawm zawk leh rang zawkin a lo lut thei dawn a. Bungraw lo lut phurtu lirthei lian tak tak zawh theih turin kawngpui four lane te, two lane te, rel kawng te sial a lo ngai leh a, heng zawng zawng hian Mizoram chhim leh hmar tlangdung hi a tantlang thlur seng sung mai dawn a. Hmasawnna chuan kan ram leilung hi a rawn chil pherh viau dawn a ni.
Hetih lai hian, power-a intodelhna tur tawk tuikhuah kan siam a ngai tiin tunah hian hydel project buaipui mek a ni a, chu chuan kan ram leilung zau tak a chim pil ang a, sik leh sa boruakah nghawng eng eng emaw a nei leh dawn bawk a ni.
Tuna ngaihtuahna luahtu lian tak pakhat chu, rel kawng lo lut thuk hian hnamdang a rawn hnuk lut ngei ngei dawn tih hi a ni. Rel kawng a lo luh hma pawha ILP hmanga chim buai tawk mek leh buai mek tawh hian, Sairang thleng broad gauge rel lo lut tur hi engtia lo dawnsawn tur nge tih hi ngaihtuah lawk ngai chu a ni reng a ni.
Thil chiang sa chu, Vaiho tam takin min rawn chim huk dawn, chim ral kan nih loh nana ‘system’ tha tak lo duan lawk hi kan tih makmawh chu a ni, tih hi.