Gaza-ah tanpuina tam zawk

Israel sipaite chuan khawvel ram tena nasa taka an nawr hnuah Gaza-ah tanpuina tam zawk thawn luh a tum thu a sawi a.
Rear Adm Daniel Hagari chuan aid convoy tam zawkin northern Gaza-ah kawng thar sialah tanpuina tam zawk an phurh luh theih nan ruahmanna siam a ni a ti a.
UN chuan nikum October thla atanga Israel leh Hamas tena indona an kalpui hnuah Gaza-ah tam tla mai thei dinhmunah an ding tawh tiin a sawi a. Brussels pawhin inhrek riltam chu indona ralthuam chikhatah hman a ni, a ti a.
EU foreign policy chief Josep Borrell chuan tanpuina thawn luh a nih loh nan land route te chu khar luihin a awm a ti zui bawk.
UN chuan Israel-in Gaza a bomb zui zel leh, security tha bawk si lo, ramri khar te chuan aid operation mumala kalpui theih lohin a siam a ni, a ti bawk a.
Israel Defence Forces (IDF) spokesman Rear Adm Hagari chuan tanpuina pekluhna tur kawng thar hawn a ni dawn a ti a. “Gaza-ah humanitarian aid luan luh tir kan tum” tiin a sawi a. IDF te chuan eitur phur lorry paruk chu an luhtir tawh thu a sawi bawk.
Rear Adm Hagari chuan convoy tam zawk te pawhin entry point an lut zel dawn a, hei bakah hian tuipui lam leh vansang lam atang pawhin tanpuina tam zawk thawn luh a ni ang a ti bawk a. Mahse, kalpui dan pangngai angin tanpuina te chu pek luh a ni dawn lo tia sawi thungin a chhan pawh Hamas te kuta a luh an hlauh vang a ni, a ti.
Gaza indona hi 7 October, 2023 a Hamas silai keng tena Israel ram luta mi 1,200 chuang thata mi tang 253 chuang an lak atanga intan a ni a. Israel-in a run zuiah Gaza-ah nunna chan 31,200 chuang an awm tawh niin Hamas enkawl health ministry chuan a tarlang.
UN chuan Gaza a Palestinian 576,000 chuang te chu eitur tlachham mai theiin an awm tawh tiin a sawi a, a bik takin Gaza hmar lam chuan harsatna an tawk nasa zual a ti bawk.
Gaza health ministry chuan mi 27 lai an zinga naupang 23 te chu malnutrition leh dehydration avangin nunna an chan tawh tiin a sawi bawk.
Tun hnaiah tanpuina tam zawk Gaza-ah a luh theih nan hmalakna kalpui nasat zual a ni a. Spanish lawng food supply 200 tonnes phur chuan Ningani zing khan gaza a lut bawk a. US chuan lawngchawlhna lailawh tanpuina pekna tur a siam bawk a.
Hetih lai hian Israel Prime Minister Benjamin Netanyahu thung chuan Rafah an beihna chu nasa zawkin an kalpui tur thu a puang thung.