Joe Biden leh Donald Trump bawk
US president Joe Biden leh a thlak tak Donald Trump te chuan an party chhungah ve ve presidential nomination chang ve vein kumin kum tawpah an inkhing leh dawn a ni.
Biden leh Trump-te hian anmahni chotute chu an hneh ve ve tawh a, Missisippi, Washington leh Georgia state ah te chakna an chan avangin delegates an mamawh tawk an hmu thei ta a ni.
Presidential nominee ni tur hian indirect election or primary neih thin a ni a, voters te chuan party convention neihnaah delegates tur zat an thlang a, chung delegates an thlante chu party presidential nominee tur chu an thlang leh ta a ni. Primary-ah chuan candidate chuan convention neihnaah delegate vote majority chu presidential nomination a neih nan majority a mamawh a ni.
“Voters te chuan he ram hmalam hun kal zel dan turah duhthlan tur an nei ta a ni. Kan democracy humhim turin nge tichhe turin kan din dawn? Duhthlan theihna kan neih leh kan zalenna kan humhim dawn nge extremist ten min lakbo sak vek se kan duh?” tiin Biden chuan chakna a chan hnuah a sawi.
Biden vs Trump Kum 77 a upa Trump chu US president ni tawh zinga criminal case nei hmasa ber niin chu pawh porn star ka hup nana sum a pek vang a ni a, campaign a neih lai pawhin court-ah a inlan thul. Hei bakah hian Trump chuan felony counts 91 hmachhawn mekin chungte chu kum 2020 election-ah a chak nana inthlan result khawih danglam tuma puh a ni a. Hei bakah hian Trump chu American president tum hnih impeached awm chhun a ni bawk.
Biden tan pawh White House luah leh harsatna chhan ber tur pakhat sawi chu kum li dang rorel leh turin a upa lutuk tawh tih a ni. Chubakah US-Mexico border crisis awm mek te, tun hnaia Georgia nursing student Laken Riley illegal migrants in a tihhlum te chu party pahnih tena inbeih nana an hman a ni.
State of the Union address-ah na takin US president chu a Republican rival chu democracy tana hlauhawmah a puh a. “Ka kun hniam dawn lo” tiin Republican tena abortion rights an khuahkhirhna chu thiata Roe vs Wade chu kenkawh leh ngei a tum thu a sawi.