Israel-in Hamas fighter 170 tihlum tawh

Israel sipai-te chuan Palestinian te hospital lian ber an luhchhuahna lamah Hamas fighter 170 chuang an tihhlum tawh thu an sawi.
Israel sipaite chuan Gaza city-a hospital lian ber Al Shifa chu March 18 khan luhchhuah tumin an bei tan a, complex zau tak nei a nih avangin a hautak hle. Israel chuan damdawi in chu Hamas leh Palestinian fighters dang tena hmunpuia an neih leh tunnel network nena inzawm vek tiin an sawi a ni.
“Damdawi In area atangin firfiak 170 chuang tihhlum an ni tawh a, mi 800 chuang rinhlelh dawp an ni tawh a, ralthuam tam tak leh terror infrastructure tam tak hmuhchhuah a ni tawh” tiin Israel sipai te chuan an sawi bawk.
Al Shifa hi Gaza Strip a damdawi in lian ber ni thin a ni a, tunah pawh territory hmar lama healthcare facility inhawng tlemte zinga mi la niin chubakah raltlan tam tak te awmkhawmna a ni bawk.
Damdawi in area atangin Hamas leh Islamic Jihad militant 350 chuang manin an awm tawh bawk a, nikum October thla hnua Israel in Hamas firfiak te a mankhawm hnem ber tum a ni bawk.
Hamas leh medical staff te chuan damdawi in chu military thila hman leh fighter te bihruk nana hmang anga puhna chu an hnawl ve thung.
Tun hnai lawkah pawh Hamas thupuangtu chuan Israel in Hamas fighters nunna chanzat a tarlan te chu fighter te ni lovin civilian zawk an ni tia sawiin Israel chu war crime kalpuiah a puh bawk.
Israel hian nikum November thla khan damdawi in hi luhchhuah tuma a beih hmasak berah nasa taka sawiselin a awm a. Mahse, damdawi in chhungah tunnel hrang hrang hmuhchhuah niin Hamas te command leh control centre te pawh hmuhchhuahin a awm zui a ni.
Hetihlai hian UN Secretary General Antonio Guterres chuan Gaza ah inkahhai a thlen nghal a ngai tiin ngenna a siam a. “Silai ri a reh a ngai a ni” tiin Egypt lam Rafah crossing a tlawhnaah a sawi a. Israel chu gaza a humanitarian goods te enfiah kher nghak lova pek luh remti tiurin a ngen bawk.
Guterres chuan US in inkahhai a awm theih nana draft resolution a putluh te Russia leh China ten duh lova an veto hnuah Rafah dinhmun dik tak hre tura tlawh a nih thu a sawi bawk a.
“Life-saving aid ten Gaza an luh a ngai. Duhthlan tur a chiang lutuk chhawmdawlna nge riltam a ni mai. Relief truck te Egyptian ramria dan te hi a dik lo a ni” tiin a sawi a.
“Palestinian te Gaza a awm te, in mal lo a nia. Khawvel mipui ten in thil tawn hi rapthlak kan ti a, Gaza a Palestinian ten thil rapthlak an tawng chhunzawm mek reng a ni” tiin a sawi bawk.
Guterres chuan Israel chu tanpuina thawnluh tur dang lo turin a ngen nawn a. Hei hi chhang letin Israel Foreign Minister Israel Katz chuan UN chief chu Gaza a humanitarian situation a Israel chauh sawisel a, tanpuina pekluhte lo suam zel tu Hamas te dem duh lovah a puh thung.