Iran-in Israel lakah phuba la dawn

Iran Revolutionary Guard commander General Hossein Salami chuan tun hnaia Israel in Syrian capital Damascus a Iran Consulate missile hmanga beia guard member lawk tak tak pasarih a tihhlum chu ‘chhanlet lohin a awm lovang’ tiin a sawi.
Heng officer thi te vuina neihah mi tam tak pungkhawmin ‘death to Israel’ tih te ‘death to America’ tihten an au rual a. Tehran khawpuiah mai ni lo Iranian khawpui dangah pawh lungawi lohna kawngzawh neih a ni.
Tehran a lungawilohna kawngzawh neihna chu Tehran University ah tihtawp niin chutah chuan Salami chuan thusawina a nei a.
“Zionist sorkar tlukchhiat chu Pathian awmpuina nen thil tih theih a ni” tiin Salami chuan a sawi a. US pawh ‘khawvelin a haw tawh a, a bik takin Muslim ram ten an haw zual bik a ni’ tiin a sawi bawk a.
Israel la awm chhan chu US thlawpna vang mai mai a ti bawk a. Salami chuan Gaza a resistance group te chu Israel in a hual mek a, an hnenah ralthuam kan pe thei lo tiin nikum October 7 atanga Israel-Hamas indona kalpui mek chungchang a sawi bawk.
Mitthite vui ni tak chu Iran-a annual rally Quds Day or Jerusalem Day neih ni tak a ni bawk a, he ni-ah hian Palestinian-te thlawpna lantir thin niin kum tinin Ramadan thla thianghlima Zirtawpmi ni hnuhnung berah kum 1979 Islamic Revolution atang khan neih a la ni ziah a ni.
Iranian leader-te chuan phuba lak ngei tumin Nilaini pawh khan Iran President Ebrahim Raisi chuan ‘chhanlet lohin a awm lovang’ tiin a lo sawi tawh bawk.
Iranian diplomat station a beih avang hian Israel chuan Hamas te nena thlaruk indona an kalpui tawh chu Mideast region pumah a alh chhuah tir ang tia hlauhna a lian hle.
Tun hnai lawkah Israel chuan Gaza a aid worker te convoy beia a tihhlum avangin khawvel ram dang ten an demna hle bawk.
Iran chuan Israel chu ram anga a pawm loh niin a hmelma kumhlun a ni bawk a. Iran chu Hamas leh Hezbollah te thlawp a kawng engkima puitu a ni bawk.