Ronaldo red card hmuh zanah Al Nassr an tlawm

Ronaldo red card hmuh zanah Al Nassr an tlawm
Thawhtanni zan Saudi Super Cup semi-final boruak sang takah Abu Dhabi club pahnih Al Nassr leh Al Hilal intumin, hun tawp hnaih lama an captain Ronaldo hnawhchhuah a nihna inkhelah 2-1-in Al Nassr an tlawm.
Sihnih fai thah an la phurh lai, hun pangngai tawp hma minute li chiah awm tawhah a naute boruak zapdaitu tur zawka ngaih Portugal record scorer chuan at a so pek a, Al-Hilal player Ali Al Bulayh nen an inbakkaihna lamah a kiuin lehlam pawl player hi a nghawk tlu a, referee Mohammed Al Hoaish chuan inngaihtuahbuai loin straight red card a phawrh.
TV atanga a lan danin United leh Real Madrid forward hlui Ronaldo hian tum hnih ngawt Al-Hilal player awmah hian a nghawk niin a lang.
Saudi Super Cup semi-final match hnuhnung zawka red card hmanga hnawhchhuah kum 39 mi Ronaldo khan khelmual a chhuahsan hmain referee kha a kuttum a hmuh niin a lang!
Tun kha Portugal international-in December 2022-a Arab team a zawm teh diah hnua red card a hmuh vawikhatna a ni.
He inkhel boruak sang taka goal hmahruai chu minute 62-a Al-Hilal player pawimawh Salem Al-Dawsari thun niin, Sergej Milinkovic-Savic thawhrah a ni.
Jorge Jesus team Al-Hilal hian an la duhtawk mai lo a, minute 10 a kal leh tihah Brazilian forward Malcolm chuan sihnih faia an hmahruaina tauhlutin, a chipui Michael-a long cross hrinchhuah a ni.
Tlai khawhnuah Liverpool forward hlui Sadio Mane chuan Abdulrahman Ghareeb-a pass atangin Al-Nassr siphurh pakhat zawk a sut then a, Al-Hilal lamin chu bak goal dang an chhuah belh duh lo.
Al-Hilal hian record siama an title palina tur an beisei zui lehna turah Ningani zan hian final match-ah Karim Benzema khelhna Al-Ittihad an tum dawn a, Thawhtanni khan semi-final dangah Al-Ittihad pawhin 2-1 bawkin Al-Wehda an hneh.
Al-Ittihad final luhna goal pawimawh pahnih hi Real Madrid captain hlui Benzema leh Morocco forward Abderrazak Hamdallah-te tihluh a ni.