World number 38 hnehtu Nagal

Monte Carlo Masters khelh mekah India mipa tennis star Sumit Nagal chuan Pathianni khan ATP ranking thar tarchhuah hlimhlawta world number 38-na luahtu Matteo Arnaldi hnehin, kum 1990 hnu lama clay leilunga khelh ATP Masters tournament singles main draw match-a Indian player chak thei hmasaber a ni.
Thawhtannia mipa tennis singles ranking thar tihchhuahah Nagal hian pen hniha hma sawnin world number 94-na a luah chho a, top 100 huangah awm mah se a ranking hmangin Monte Carlo hmuna ATP Masters 1000 event hi a khel pha lo a, qualifying kaltlanga main draw a inhlapkai hnuah Indian tennis tran mellung pawimawh a phun zui ta a ni.
A first round match-a Italian Arnaldi laka 5-7, 6-2, 6-4 hnehna a sualchhuah hnuah Sumit Nagal hian World No 7 luahtu Denmark tlangval hriat hlawh Holger Rune a hmachhawn zui leh ang.
Monte Carlo Masters mipa singles inkhel dangh Britain innghahna lian pahnih Cameron Norrie leh Dan Evans-te chu round hmasaber paltlang zo lo zawngin an tla fel.
British number one leh world number 30 ni bawk Norrie hi 15th seed Karen Khachanov chuan 7-5 7-6 (7-3)-in a hneh a, Russian Khachanov hian second round lamah Argentina player Francisco Cerundolo a tum leh ang.
Briton dang world number 50 Evans chu 6-1 6-4-in Austria player Sebastian Ofner lakah a tlawm thung.
British number three Dan Evans hi kumin bik ATP Tour singles match-ah chak zawn a la nei miah lo!
Monte Carlo tournament hi Masters tournament an tih chin bik pakaw zinga pakhat niin, Masters chin hi men’s tour event hoah chuan Grand Slam palite tih loha inelna lian ber a ni.